الاثنين، 4 أغسطس 2008

فيينك يا ام الدنيا


الصراحة انا مش عارفة ابدأ ازاى

على العموم انا هقول كل اللى فى قلبى عشان الكبت يروح

هههههههههههه

من يومين كده رحنا على مستشفى الجامعة اللى فى الزقازيق

وذلك لأن........

لا داعى لذكر السبب

المهم

الصراحة فى البداية كانت المعاملة كويسة نوعا ما فى المستشفى

وطبعا ده كان بسبب ان معانا وسطة

وبعد كده بدأت المعاملة تكون مش حلوة تدريجيا

وطبعا ده بسبب غياب الوسطة

انا كنت عايزة اشكى المستشفى ديه لأى حد

ومش لقيت غيركوا

اولا مميزاتها

ما شاء الله مميزاتها تتحسد

يعنى تاخد 1 من 10

اما بقى بالنسبة للعيوب

فتاخد 100من 10

والصراحة مش تنفع مستشفى خالص

اولا الممرضات المفروض يساعدوا المرضى وده

مش بيحصل الا بنبح الصوت واشراف الوسطة

وغير كده المستشفى غير نظيفة بالمرة

يعنى تمشى تلاقى جنبك شاش كله دم وقطن

وسرنجات وحاجات تانية مقرفة كتيير

وغير كده الاطباء (مش كلهم طبعا) بيقعدوا ساعات

عشان ييجوا لمريض

وده فعلا حصل معانا لما كنا فى المستشفى ...

كنا محتاجين دكتور ضرورى وفعلا جيه الدكتور

بس بعديها بيوم

بجد والله انا مش بهزر

وكمان ده غير الصوت العالى الصادر من العاملات

والممرضات اللى مش عايزين يعملوا حاجة

وعايزين يستريحوا ويشغلوا المرضى


كفاية كده ..كفاية فضايح


الصراحة ده مثال من مليوون الامثلة

اللى بتدل على ان مصر دولة مش بتمشى الا

بالرشوة والوسطة


كان نفسى بلدى تكون احسن من كده

هناك 31 تعليقًا:

غير معرف يقول...

Gomen kudasai.

التائب يقول...

السلام عليكم ورحمه الله وبركاته
صديقتى
اولا الف سلامه على الحاله اللى كانت معاكِ
ويار بتكون بخير دلوقتى
ونسال الله الشافى المعافى ان يشفه شفاء لايغادر سقما
ثانيا بجد دى حاجه مخزيه جدا
انا معاكِ انت الوسطه والرشوه فى كل مكان
بس الواحد بيكون مخنوق وهو رايح مكان بوسطه
امتى يجى اليوم اللى الواحد يروح اى مكان ويتعامل بكل احترام وحياديه
اللهم اصلح احوال المسلسمين
رائع البوست بجد
دمتى بكل خير وصحه وراحه بال
والله الموفق

sara draz يقول...

philippine lotto result
شكرا على التعليق الغريب
رغم انى مش فاهماه
لو حد فاهم يفهمنى

sara draz يقول...

اخى التائب الحائر
جزاك الله خيرا على هذا التعليق
الرائع
وانا معاك فعلا فى اللى قولته
لازم الانسان يكون له قيمته من غير
وسطة او رشوة

ونفسى اشوفك يا بلدى احسن من كده

وتحياتى اليك
وتسلم

أنفاس الصباح يقول...

حبيبتى ريحانة الاسلام
مدونتك جميلة ورقيقة
وكلماتك راقية وتعكس شخصية متميزة
صحيح نتألم لحلنا
لكن تفتكرى مين يقدر يغير الا اصحاب القلوب الحية امثالك
احنا بحاجة الى استعادة الانسان بداخلنا
احساسنا بالكرامة
لازم نطالب بحقوقنا وحقوق المستضعفين منا
لازم نتعاون على نصرة الحق وعودة العدل والضمير يحكم سلوكنا من جديد
دمتى حبيبتى حية الوجدان

غير معرف يقول...

حبيبتي الحلوة اللي واحشاني جدا
بخصوص ما رايتيه
للاسف هو ده الواقع المر
بس صدقيني
على قد ما شوفتي حاجات وحشة في المستشفى
بس صدقيني
في هناك قلة جميييلة جدا
معطاءة وخلاقة وعندها نفس حلمك ان بلدنا تبقى احسن من كدة
يعني انا رحت مرة من كام سنة لظرف ما ربنا لا يعيدها ايام
المهم
شفت هناك دكتور كان زميل زوجي في المدرسة
واتكلمنا عن الوضع في اقسام مثل الاورام خاصة اورام الاطفال وامراض الدم
وعرفت انهم بيلموا فلوس علشان يجيبوا حاجات للاطفال دي
لمحة اخرى
اعرف صيدلانية واحسبها على خير
كانت بتبتز مندوبي شركات الادوية لعمل الخير
ازاي؟؟؟
اقولك
يعني هو عاوزها تطلب الدواء الفلاني بتاع شركته
واللي له اكثر من بديل في شركات اخرى
فكانت بتشترط عليه انه مثلا
يجيب تلفزيون للاطفال في العنابر
او
يعملوا حفلة ترفيهية للاطفال المساكين
فاهمة
يعني في ناس بتحاول
ممكن بعضهم يحاول غلط
ويمكن بعضهم يحاول صح
احنا بقى لازم نفرض اخلاقنا وتربيتنا واسلامنا
يعني احنا نحافظ على ما استخدمناه نظيف وان كانت المستشفى كلها قذرة
احنا نتعامل بالحسنى حتى مع الممرضة الوحشة الغتتة اللي ما ببتقيش ربنا في شغلها
وبرضه لازم نقول لاي مسؤول عن التقصير وما نطنش
علشان المكسلين دول يروحوا يقعدوا في بيوتهم وييجي غيرهم يشتغل
وربنا يفرح قلوبنا كلنا وبلدنا تبقى احلى واحلى اللهم امين
اشوفك قريب
احبك في الله

sara draz يقول...

اختى فى الله
انفاس الصباح
جزاكى الله خيرا على تعليقك الرائع
وفعلا عندك حق احنا محتاجين الانسان
الحقيقى يرجع تانى
الانسان اللى عنده كرامة وانسانية
الانسان اللى بيحاول يرضى ربه
ويفيد بلده
الانسان اللى لما يشوف حاجة غلط يحاول يغيرها

لقد اسعدتينى بمرورك هنا فى مدونتى
وتحياتى اليكى
وتسلمين

لؤلؤة الاسلام يقول...

اختى الحبيبة ريحانة الاسلام

فعلا ديه حاجة كويسة اوى انك تعرضى هذه القضية لانها فعلا في حاجة الى تصليح و انتى بجد وحشانى اوى اوى اوى و ربنا معاكى \

و مش عليكى الا الدعاء و حسبنا الله و نعم الوكيل

و تقبلى تحيياتى
وعايزة اقولك حلجة مش عارفة هى مناسبة دلوقتى و لا لا
ان انتى لما تقابلك مشكلة كبيرة مش تقولى يا رب عندى مشكلة كبيرة بس قولى يل مشكلة عندى رب كريم
اختك خديجة

sara draz يقول...

اختى الحبيبة دعاء
لقد قلتيها بكل صراحة انهم قلة قليلة
ودى حاجة تزعل اوى
بس النماذج اللى ذكرتيها حلوة اوى
وياريت يكون فى منها كتير
واحنا بنحاول على قدما نقدر
وربنا يكون فى العون

ونفسى اشوفك يا بلدى احسن من كده

وتحياتى اليكى
وتسلمين


انى احبك فى الله

sara draz يقول...

اختى وحبيبتى وصديقتى خديجة
جزاكى الله خيرا على هذا التعليق الطيب

وجزاكى الله خيرا على وقوفك بجانبى وقت المحنة

وفعلا ياانا لازم اقول
يا هم عندى رب كريم رحيم

وتحياتى اليكى
وتسلمين

Abdallah Hosni يقول...

ده التطور الطبيعي للحاجة الساقعة

كل المستشفيات كده للأسف الجامعة القديمة الاحرار....اى مستضفى حكومى م الاخر

ودى فعلا حاجة محزنة اووووى لازم واسطة فى كل حاجة وعلى فكرة الواسطة دى حاجة تجري فى دماء المصريين

وللأسف حكومتنا الموقرة هى السبب مافيش مرتبات مافيش حوافز مافيش تشجيع

ايه المقابل تتوقعى....لا انسانية..واسطة

Ghada , Rofayda يقول...

اولا ..الف سلامه لملك روحي شفاها الله وعفاها وربنا يجعله في ميزان حسانتكم

ثانيا..عذرا على تأخرنا في الرد...

ثالثا...للاسف انا قلبي بيتقطع كل ما بدخل مستشفى في بلدنا الحبيبه..بجد مهزله....

تحيااااااتي...

وعسى الحزن ما يعرف دربك...

sara draz يقول...

اخى عبدالله
للاسف وكلى اسف انى اوافقك فى رأيك
الواسطة والرشوة اصبحوا شئ اساسى عند
الناس
ولكن
هذا حال الحكومة
فماذا نفعل؟

ونفسى اشوفك يا بلدى احسن من كده

وتحياتى اليك
وتسلم

sara draz يقول...

اختاى غادة ورفيدة
اولا؛الله يسلمك وجزاكى الله خيرا على ما فعلتيه
ثانيا؛ولا يهمك
ثالثا؛للاسف المستشفيات العامة مش مهزلة دى بقت مجزرة

وتحياتى اليكما
وتسلمن

روح الاسلام يقول...

ريحانة الاسلام
اولا انا اسفة اوى انى مابكلمكيش من فترة لكن والله عندى ظروف كتييييييرة اوى مانعانى انى اقعد على النت ثانيا بالنسبة للموضوع انتى فعلا عندك حق اى انسان دلوقتى ماعندوش واسطة نصيحة منى لية يقعد جمب الحيط ويندب حظة احسن هههههه هم يضحك وهم يبكى..وألف الف الف سلامة لملك روحى وان شاء الله ترجع زى الأول واحسن وانا اسفة اوى انى اتأخرت فى التعليق تقبلى تحياتى يا جميل

sara draz يقول...

اختى وحبيبتى فى الله روح الاسلام
جزاكى الله خيرا على مرورك الطيب
ولا تأسفى بسبب تأخرك
كلنا اخوات
عادى يعنى
وعلى فكرة انتى وحشتينى اوى
وعايزين نشوف بعض ان شاء الله
وتحياتى ليكى يا جميل
وتسلمين

انى احبكم فى الله يقول...

السلام عليكم الف سلامه على الحاله ويا رب تكون بخير دلوقتى معلش انا كنت مسافره
وياريت تكون الرساله وصلتك قلبى معاكى وشكرا على الموضوع

sara draz يقول...

اختى الغالية انى احبكم فى الله
جزاكى الله خيرا على المرور الطيب
وارجو ان تنورينى دائما
وجزاك الله خيرا على السؤال


وتحياتى اليكى
وتسلمين

انى احبكم فى الله يقول...

اه صحيح انتى فينك مش بتزورى المدونه ليه ياريت تزورينى انا فى انتظار ك؟

sara draz يقول...

اختى انى احبكم فى الله
اعذرينى انا والله مش فاضية
وانتى عارفة
ومش بقعد على الكمبيوتر كتيير
عذرا

وتحياتى اليكى
وتسلمين

حسن حنفى يقول...

ممممممممممم

بجد البلد عايزه تصليحات كتير

بس ياريت حد يحاول

حضرتك نورتي مدونتي

اتمني التواصل

sara draz يقول...

اخى حسن حنفى

لقد نورت مدونتى بتعليقك

وجزاك الله خيرا

ملحوظة
مدونتك جامدة

وتحياتى اليك
وتسلم

رؤية يقول...

كلنا نفسنا بلدنا تكون احسن من كدا،
وللاسف دا مش فى المستشفيات بس،
دا فى كل مكان حكومى،
ولا ادرى كيف يكون مرفق بهذه الخطورة كمستشفى ويكون فى اهمال،
طبعا الاجابة معروفة لان وصحتنا، وحياتنا باكملها ليس لها اهميه،
لو اتكلمنا فى المواضيع هانتفتح فخلينا كبتين فى نفسنا وخلاص،
وانا لله وانا اليه راجعون،

سعدت بالتعرف على مدونتك،
تحياتى لك.

لؤلؤة الاسلام يقول...

حبييبتى سااارة ليكى عندى تااااج و يا ريت تيجى تخديه

تلميذة سلمان الفارسى يقول...

صحيح
لو يتقى اناس الله فيما يقعلون
أين الإحسان
لو يعبد كل إنسان الله كأنه يراه لحلت مشاكل كثيره
حسبنا الله ونعم الوكيل
حبيبتى فى الله

انسان وبس ! يقول...

"انا لله وانا اليه راجعون"

مش هقولك حولى توصلى شكوتك دى لحد !

مع ان ده المفروض اننا نعمله

بس متهيألى اننا مهما اشتكينا ، وجم وصلحوا .....شويه والفساد يرجع تانى

اظن انه فيه حاجه غلط
مش الحكومه بالفساد اللى فيها بس
الناس كمان كتير منهم ....فيه حاجه غلط
يمكن قل الوازع الدينى
او الضمير
ولا هو ده الضمير المصرى!

- مدونتك جميله جدا ومتنوعه وانا اخدت فيها جوله وهاجى تانى باذن الله

انتى صاحبة خديجه صح - انتى من سنها، وزجازيج برضو - بستغرب ان فيه بنات فى سنك وبالعقل ده .....او يمكن انا اللى هايف او ان اللى فى سنك اغلبهم هايفين

ربنا يبارك فيكى

sara draz يقول...

اختى فى الله رؤية

فعلا لقد صدقتى انا لله وانا اليه راجعون

ده حالنا وللاسف الانسان المصرى اصبح بلا اهمية

بس انا عن نفسى مش هكبت فى نفسى
انا نفسى صوتى يتسمع
واحاول اغير

وتحياتى اليك
ودمتى بخير
وتسلمين

sara draz يقول...

اختى خديجة وصديقتى

اخيرا جالى تااااااااااااج

دا انا هوزع عليكوا شربات بقى

جزاكى الله خيرا

وتحياتى اليكى
وتسلمين

sara draz يقول...

اختى وحبييتى فى الله تلميذة سلمان الفارسى

لقد صدقت حقا
اين الاحسان؟؟؟

اين الدين؟؟؟
اين ضمائر الناس؟؟؟

لقد نورتى مدونتى حقا

تحياتى اليكى
وتسلمين

sara draz يقول...

اخى انسان بلا عنوان
جزاك الله كل الخير لمرورك بمدونتى

لقد شرفتنى بمرورك حقا

ولقد كتبت كلاما حقا
ان الانسان المصرى قد ضاع ضميره وقل دينه

والصراحة فعلا ان انا وخديجة اصحاب
وكمان احنا عملين جروب مسميينه جروب الاسلام
ومعانا ناس تانية كمان

وكلنا بنحاول نعمل حاجة صح لديننا وبلدنا

وتحياتى اليك
وتسلم

راء يقول...

السلام عليكم

ايه ده ده طلع مش عندنا بس في كل حتةفي مصر....

عموما انا مش هعلق لان الموضوع هيقلب بسخية زي ما حصل في البوست بتاعي ومش عاوزة ابوظلك المدونة برغيي :)

بس مادام شايفين الغلط ومش راضيين عنه يا ريحانة الاسلام هنقدر نغيره بايدينا ونبدأ بنفسنا ولما تبقي دوك كبيرة اد الدنيا ابقي خدي بالك من كده وصدقيني هتغيري اللي عاوزة تغيريه

احبك في الله