الأحد، 30 ديسمبر 2012

أى كلام ..



ورجعت تانى اتكلم معاك .. زى مايكون مليش فى الدنيا غيرك

 سؤال بس .. انت مش ناوى تبقى حقيقى بقى ؟ّ!

عارف .. مش مهم تكون حقيقى , المهم انى افضفض وارتاح

..

 شكرا لكل حد استحملنى وهو مش طايق 

..
عشمت فيك أوى فخذلتنى

عارف انت بجد كل ما تخذلنى أعرف ان محدش غير ربنا هو عمره مبيخذلنى

انت مش وحش .. انا بس اللى ساذجة أوى

..

اكتر حاجة بتوجعنى اوى لما تكون اقرب حد ليا وتفقد ايمانك بيا

 او تتريق على شئ انا مؤمنة بيه ..

كل اللى بعدت عنهم فى حياتى بإرادتى كانو بسبب الموضوع دا

انت متخيل انت عملت فيا ايه !

انت كسرت مجاديفى .. وبس
..

كفاكِ تجبرا وغرورا ..فلستِ الأميرة وحدك هنا !

..

عايزة بس اقولك حاجة

ان كل شئ لما بتزوده بيكون طعمه - ماسخ - 

فلما بتتقل زيادة عن اللزوم وتكون مغرور بتكون بايخ اوى

معلش بقولك كدا عشان تفوق لنفسك

مش مهم تعمل كدا معايا .. دى نصيحة ليك وللزمن

ولا كإنك سمعت حاجة ..
 ..

نفسى يارب اقابل حد شبهى اوى 

يارب 

..


علافكرة انا بعرف أشتم واتخانق واقطع علاقاتى بالناس

وبعرف اقول فى وش الناس انهم وحشين وكدابين ومنافقين

ويتوع مصالحهم 

وكمان طلعت بعرف .. أكدب اوى

..
بص من الاخر انا كدا

عارفة انى وحشة اوى .. بس انت لو متمسك بيا

هتحاول تفضل جنبى ..

على الاقل هتحاول صح ؟

.. 

ياما فارقنا ناس قولنا فراقهم هيقلتلنا .. وأدينا اهو عايشين وزى الفل

ياااه دحنا منافقين اوى 

.. 

الأربعاء، 19 ديسمبر 2012

أنا بقيتك !





- استنى لحظة .. عايزة اقولك حاجة 

_ ايه ؟

- .............. أنا بقيتك 

_ ايه !

- أنا بقيتك , 

عارف يعنى ايه بقيتك ؟!

كل حاجة بقيت بعملها زيك , كل حاجة بقيت بشوفها بعيونك
حتى انى بقيت بشوفنى انت !


تعبيرات وشك ,جنونك, ضحكتك , حتى أغانيك اللى بتدندن بيها 
, صوتك وكلمة " ألو " اللى بتقولها بألاطة , عينيك اللى بتجيبها شمال
ويمين فى الثانية خمسميت مرة , برطمتك من تحت لتحت وهمسك ليا
وسط الناس , كل دا بقيت بعمله زيك
زى ماتكون روحى شربت روحك !

أفلامك , ايفيهاتك , حتى روايحك اللى بتحبها وأقلامك ,
عتابك , وهزارك , ورخامتك وسط صحابك و تريقتك على نفسك


أنا  بجد بقيتك  ..
 
تفتكر هييجى اليوم اللى انت فيه هتبقانى ؟!

الثلاثاء، 11 ديسمبر 2012

ألا تأتى ؟!



ولأن قلبى لم يعد يحتمل الفراق

ولأنه أتعبى السفر الى عالمك وحيده

ألا تأتى ..

ألا تأخذنى من يدى وتوصلنى لأقرب نقطة من روحك

ألا تأتى الآن لتمسح عنى حزنى 

وتربط على قلبى وتشعرنى بدفء قربك

أشتاق إلينا ,

 إلى كل تفصيلة لم نعشها

فقط تمنيناها 

إلى كل لقاء أعددنا له ولم يحالفنا الحظ فيه
..
 
إليك أشتاق .. 

فهلا تأتى ..؟

الاثنين، 3 ديسمبر 2012

طريق يخلو من كل شئ سوى حبيبين ..




هو .. يعشقها ويتمنى لو يظفر بنظرة واحدة من عينيها السوداوين ..

هى .. تحبه بجنون , فقط تتمنى سماع صوته الدافئ

هو .. يعشق حياءها , يتمنى لو يكون فارسها , لو أنها تختاره من بين كل 

الفرسان ليكون أمانها وحلمها ودفء قلبها 

آخٍ .. كم يتمنى لو تعلم كم يغار عليها من نظراتهم ..

.....
هى .. تدعو الله فى كل يوم أن يحفظ قلبها ويحفظه ,

 تردد " اللهم ان كان خيرًا لى فاجعله هديتك لى "

هو .. أبدًا لن يصارحها بحبه , فهى جوهرته المصونة 

, يراقبها من بعيد ويرجو الله أن تكون نصفه الثانى المكتوب له

هى .. تدعو ربها ليلًا " اللهم لا تعلق قلبى بما ليس لى "

..............


هو آتٍ من بعيد ينظر للسماء وكأنه لا يعرفها 

, يغض بصره حتى عنها ..

هى تسير على عجلة من أمرها , تنظر الى سواد الأرض 

, تتمنى لو أنها تتمسك جيدًا بقلبها حتى لا يهرب منها 

ويجعلها تنظر له او تبتسم ..


فى أول الطريق " هو " و آتية "هى " ... يلتقيان , 

 يمران بجانب بعضها البعض  , 

عيناهما تجيدان التخفى , 

 والقلب يتمنى لو يلتقيان حقًا

الاثنين، 26 نوفمبر 2012

:( يارب دافع عننا ..


قال تعالى : 

إنَّ اللَّهَ يُدَافِعُ عَنِ الَّذِينَ آمَنُوا إِنَّ اللَّهَ لَا يُحِبُّ كُلَّ خَوَّانٍ كَفُورٍ

الاثنين، 19 نوفمبر 2012

غصب عننا سياسة ..



نحن لا نختار أبدًا الانشغال بـ " السياسة " ولكنها هى التى تختارنا ..

تتدخل فى تفاصيل حياتنا وكأنها الشئ الأهم , ومن منا يرغب فى ازعاجها ؟!

ربما لم تتسنَّ لنا الفرصة للاختيار , تجبرنا على الانصات لها والانتظار ..

..

مائدة الطعام , حولها نحن , ينقصها كرسيٌّ وطبقٌ .. أخذته " السياسة " الى المعتقل 

ليست السياسة همى .. ولكنه أخى !


تتسلل إلى قدماى فى كل ليلةٍ لسعات البرد ..

أخذوا منى موطنى .. فكيف الدفء ؟

ليست السياسة همى .. ولكنه موطنى !


فى منتصف الليل , دقُّوا علينا الأبواب

عرفنا أنه الموعد , أعطيته حقيبته المُعَّدة مُسبقًا واحتضنته بقوة ..

أخذوه ورحلوا 

ليست السياسة همى .. ولكنه زوجى !

..
 
نتشاجر انا وأمى فى كل يوم , تمنعنى من النزول للتظاهر , 

تعارض كتاباتى الساخرة والناقدة من السلطات , 

تخاف على ابنتها من الاعتقال او السحل والتعذيب
 
كم أتمنى يا أمى ان أنعم بليالٍ هادئة , 

لا أفكر فيها سوى فى حياتى الصغيرة 

ولكنها " السياسة " تأبى أن تتركنى لحالى وشأنى 

وتقحمنى فى أغوارها !

الاثنين، 29 أكتوبر 2012

أنا عشقت ..


عندما نعشق فإننا نعيش الدنيا بمقاييس مختلفة 

 , مقاييس تتعالى على مقاييس البشر ..

نتحول من كل ما هو سئ الى كل ما هو مثالى ..

نعطى من عشقنا كل ما نملك , 

ونعده بأن نعطيه ما لا نملك , 

ونتمنى لو أعطيناه نجوم السماء وأقمار العاشقين ..

تتسع أرواحنا وتفيض , تخرج منها السعادة لتملأ الدنيا سلاما وسكونا ..

تعلو روحانياتنا ونزهد كل ما هو مادى ..

نعشق السماء والبحار والأقمار والأمنيات المنسية والفراشات ..

نقوى ونشعر بالأمان .. 

تزهر قلوبنا وتنير ...
 .

.
.
.
.

أنا عشِقت .

.......................
اسم البوست هو اسم كتاب لمحمد المنسى قنديل

السبت، 20 أكتوبر 2012

عتاب !!!


لما الشوق يفوق الحد ممكن ينقلب لعتاب او شئ بيوجع

واما أجيلك بجرى عليك فرحانة بشوفتك ومستنياك تفتحلى
حضنك .. ألاقيك ماسك سيجارة بايد والتانية ماددها ليا عشان تسلم !
تفتكر مش هتوِجع !
لما تحرمنى من حضن اللقا وكلمة وحشتينى ..مش هتوجع !
لما تفضل تحكيلى عن كل حاجة عملتها وتنسى تسألنى ازيك ؟ مش هتوجع !
لما ولما ولما .. وفى الاخر تسألنى مالك .. اقولك مفيش .. تصدق !!

...........

" لو تعرفى أنا قد ايه موجود تملى فى سكتك , وحلم دافى لسة تحت مخدتك
, انا قوتك , حريتك , حنيتك ... "

..............

كل اللى يقولك انا عارف حدودى كويس كداب
لانه طالما تنازل عن الايمان بالحدود اللى ربنا حطهاله كإنسان 
ووضع نفسه كإله يحط لنفسه حدوده فهو كداب .. ليس اكثر

تلاقيه يفضل ينسحب مع الموج لغاية ما يغرق ويوم ما يفوق 
يقولك غلطة .. عادى انسان وبيغلط 

وا عجبى !!
...........

تعبت من الناس اللى بتوحشنى وملهاش وجود ..
تعبت من الخيال ,, سارة حاولى تكونى واقعية

ويوم ما قررت اكون واقعية كرهت نفسى والناس اللى حواليا
, لازم الانسان يتعلق بشئ خيالى يسرح فيه كل ما الواقع يزنقه

.......

مشكلتى معاكى انك قطعتى الاتفاقيات اللى بيننا والعهود
ومخدتيش بالك .. ولما اسألك وسط حكاويكى
اللى عملتيه دا عادى ؟ ..فتقوليلى بكل ثقة اه عادى

مش فاهمة ايه اللى بقى عادى وايه اللى مش عادى 
!!
وبتقوليلى اه عادى من ايمانك بيه فعلا ولا مش عايزة تحسى
انك اتكسفتى من سؤالى او انى احرجتك !!
بس احنا من امتى بيننا احراج او كلام من دا !

...............

 ولما بتحصل حاجة وحشة بنرفضها بفطرتنا ونبعدها عننا
لكن لما نسيبها ونتعود عليها .. فيحصل انتكاس للفطرة
ويبقى الغلط عندها صح وتفقد البصيرة 
............

ضعيفة اوى .....