أسي

لو أن الود يجئ منك بلا تكلف .. لكان وقعه مختلف
حاولت كثيرا أن ترغم نفسك على التكيف معي
ونجحت في البداية , ولكنك ظننت أن الأمر سيستمر .. وأخطأت
قلت لك مرارا " كف عن تكلفك .. كن طبيعيا معي " ولكنك تظاهرت بأن هذه طبيعتك
وماذا جنينا ؟ .. لا شئ سوي انقطاعك وانتظاري
..
ولماذا أنتظر ... وانت الذي تخبرني مرارا بأنه لا غالٍ لديك
وكل البشر سواء
وأنك تحتاج سنتين من الانقطاع حتي تشعر بالحنين لأحدهم !
وأنا التي لا تطيق .. إن مرَّ يوم عليّ دون أحبابي أشعر بأنه ينقصني شئ ..
وأسرع لأطمن عليهم ..
كيف تآلفت قلوبنا ! لا أعلم ..
لكن قلبي قد هوي , وقلبك عني قد ..

وردة زرقا .. رضوي طارق

 مرة كنت بتمشي وسرحانة وفجأة لقيت وردة زرقا في جنينة البيت اللي كنت ماشية جنبه,
اول حاجة فكرت فيها ساعتها هي " رضوي طارق" , قعدت اقول جوايا " هييييه يا رووووودي
انا مش مصدقة لقيت وردة زرررقا , باللون اللي بتحبيه .. "
 كنت مبسوطة اوي , وكان نفسي رضوي تكون موجودة معايا ساعتها واشوف فرحتها بالوردة
الوردة الزرقا دي كانت مميزة , فريدة اوي .. وتشبهلك اوي يا رضوي يا اختيتي
رغم انها كانت لوحدها ومش حواليها ورد ولا زرع كتير , بس كانت براقة اوي وقوية اوي
يمكن الوردة الزرقا دي تشبه شوية ل " ندي " في بريقها
رضوي هي اول حد دوقت معاه حلاوة التدوين والمدونات , اول حد قعدت احلم هقابلها ازاي
قابلتها اكتر من خمسوميت مرة في خيالي . وكل مرة كنت بتخيل لقاء مختلف
كبرنا سوا وافكارنا اتمحورت واتعمقت واتغيرت بردو سوا
واختلفنا واتفقنا وعيطنا وكتبنا واكتئابنا بردو سوا
وروحنا معرض الكتاب سوا ولفينا واشترينا عبايات واكلنا سوا
عملنا حاجات كتير اوي سوا ,, وحاجات اكتر جوا خيالنا واحلامنا
بعد المسافات كان بيوجعنا .. وكنا بنحب الازرق
رضوي الحد اللي كنا بنحلم سوا اول كتاب كل حد فينا هيكتبه هيكون عامل ازاى
رضوي اختيتي اللي كبرت معاها حرفيا ..
انا بحب رضوي اوي , اوي اوي بجد
كل ما اجي القاهرة بحس اني بدور عليها وسط الناس , وبتمني اقابلها قدرا
رضوي عنيها جميلة اوي , وعياطها بيوجع قلبي اوي
رضوي كبرت يا سارة ومبقيناش بنتكلم زي زمان , بس هي في الركن الجواني في قلبي
مكانتها في قلبي زي ماهي ,
المشابك والشرابات والاقلام والبرفيوم اللي جابتهولي من الحسين ..وال 3 دعوات
كل حاجة جوا قلبي اوي
فيه واحدة بتجيلي الصيدلية شبه رضوي اوي لما تكون " ماما "
بفضل متنحالها وببقي عايزة اقولها " انتي شبه رضوي اووي وانا بحب رضوي اووي اووي "
... مفتقداكي بجد يا أختيتي

يعز عليّ حين أدير عيني , أفتش في مكانك لا أراك

أراك هجرتني هجرا طويلا

وما عودتني من قبل ذاك ..

عهدتك لا تطيق الصبر عني

وتعصي في ودادي من نهاك  ..


بقالك كتير مجيتليش في الحلم , وحشتني يا غالي اوي
عارف يا غالي الدنيا اتغيرت اوي من بعدك
فيه حاجات كتير حصلت , حاسة انك لو كنت هنا مكنتش هتستحملها وهتعجز
وانا مكنتش هستحمل اشوفك عجوز ..
عارف يا غالي , كان نفسي اوي تشوفني وانا دكتورة
انا كبيرة اهو يا جدو وبقيت " قد الباب " وبقيت دكتورة بجد
مش كنت دايما تقولهم الدكتورة سارة جت اهي .. من وانا لسة صغيرة ؟
حبيبي يا جدو , ربنا يرحمك يارب ويجعل قبرك روضة من رياض الجنة يارب
محدش في الدنيا يشبهلك ..
عارف اكتر حاجة بشتاقلها هي ايدك .. ايدك وحضنك
مكنش فيه حضن دافي زي حضنك انت , ولا ايد حنينة زي ايدك
ربنا يرحمك يارب
عارف لولا ان احنا عارفين وموقنين ان فيه آخرة وجنة باذن الله
كان زمان قلوبنا اتفطرت ..
عارف يا جدو بيجيلي ناس كبار كتير في الصيدلية , وفيه واحد منهم بيقولي يا " بنتي"
عمو دا بيفكرني بيك اوي يا جدو , ببقي نفسي اوطي ابوس ايده زي ما كنت ببوس ايدك الحنينة ..
من بعد موتك يا جدو وانا بقيت بخاف من الموت وبحسه قريب اوي
وبخاف اخسر اي حد بحبه في لحظة , عشان كدا مبقتش بستني اخسرهم
بقيت بكلمهم دايما وكتير ومزعلش منهم فترة طويلة او بحاول
مبقتش مآمنة للوقت والزمان زي زمان
الدنيا بتجري اوي اوي يا جدو .. تخيل انا فاضلي كام شهر واتم 24 سنة !
عمري بيجري يا جدو
هو انت مش هتيجي تزورني بقي وتحضنني زى زمان ؟
انا صاحبت ناس كتير اوي يا جدو , بس كنت عايزة احكيلك عليها
قلبها طيب اوي يا جدو , وانا حبيتها اوي
بس قلبي بيوجعني عليها , ومش عارفة اعمل ايه ..
فيه حاجات يا جدو مش بتلاقي حروف تطلع فيها
بتتكتم في قلبنا ومبتخرجش
انا نفسي بس ربنا يجمعنا كلنا في الجنة ويرضي عنا