الجمعة، 17 ديسمبر 2010

كبرياء..


فقط.....يمنعها كبرياؤها من البكاء

...

فتظل تحبس دمعاتها

وتقنع نفسها بأنها

..غير قابلة للكسر..

ولكن تفاجئ بأنها مجرد

ضحية

من ضحايا
كبرياؤها...

الخميس، 9 ديسمبر 2010

لوحدى.....


كنت فاكرة انك لما تسيبنى وهتمشى مش هقدر اعيش
...
بس الغريب انى عايشة دلوقتى اهو وبكتب عنك
كنت دايما عايز تقولى انى هموت
ولازم تعرفى تعيشى من بعدى
بس انا
عمرى ما فكرت فى انك ممكن تسيبنى
كنت اوقات بفكر ان ممكن ناس بحبهم يموتوا
بس عمرى ما فكرت انك هتموت بجد وتسيبنى !!
.....
انت عارف..
انا لغاية دلوقتى حاسة انك مسافر
وهترجع قريب
واللى بيصبرنى انك بتجيلى فى الحلم تطمن عليا ..
علا فكرة
انت بتوحشنى اوى

ومش عارفة ان كنت سامعنى ولا لأ .......
لو كنت سامعنى ..
عايزة اقولك

ان من بعدك فقدت الشعور بالامان
وثقتى فى نفسى بقت صفر
وانى...انى...نفسى اترمى فى حضنك
واعيط اوى واشتكيلك واقولك
على كل اللى مضايقنى .......
...
شفت انت طلعت عندى غالى اوى ازاى
...............
الله يرحمك يا حبيبى...

الخميس، 2 ديسمبر 2010

من غيرك..


عارف كنت ليه بحب البرد اوى؟؟

لأنك كنت بتاخد ايديا البـــــردانة وتحطها

بين ايديك الدفيانة وتدفيهالى بحنانـــــــك

عشان كده البرد السنادى من غيرك مفيهوش دفــا

الثلاثاء، 16 نوفمبر 2010

حبة صور..

السلامو عليكم..كل سنة وانتو طيبييييييين

يا اجدع مدونين

ايه الاخبار والاحوال والعيدية واللحمة

واللاذى منه..؟؟ ^_^

يعنى صورت كام صورة كده

عايزة اخد رأيكم فيهم

احم احم ..بسم الله




^___^i love this pic...:D

ده مسجد الفتح عندنا فى الزقازيق..اللى هوه مسجد عبد الحليم ^_^كوكو حبيبى..ماى دبدوب

فكرتنى بوحدة صبحتى اوى ..
الصورة دى ممكن تفتكرها غريبة شوية..لوحد قدر يفهمها يقولنا ^____^

الأربعاء، 10 نوفمبر 2010

صوتك وخروف

السلامو عليكم ورحمة الله وبركاته

ازيكم يا نااااااس....عامليين ايه؟

طب الحمد لله انكم كويسين

^______^

النهاردة

مش هرغى كتير معاكم

انا بس جاية افكركم بالانتخاااااااباااااااات

الانتخابات على الابواب

واخيييييييرا لينا حق اهو قدام عينينا

بلاش نستهبل ونضيعه

خليك ايجابى وانزل انتخب

شوف مين الانسب وانتخبه

انما اياك ثم اياك ثم اياك تسيب صوتك

..انت بتهزززززززر ولا ايه

يوم ما يبقى ليك حق تسيبه كده؟؟؟؟

لالالالالالا

دى مش اخلاق ولاد البلد

^_^

يبقى كلنا ننزل ننتخب ونعمل اللى علينا

والنتيجة بقى بتاعة ربنا

وافتكر حاجة

انك لو ما عملتش اللى عليك ووديت صوتك

متجيش تشتكى وتقول العيش فيه زلط

متقولش الاسعار نار...متقولش متقولش

لانك ما عملتش اللى عليك

.....

وثانيا بقى شدوا حيلكم معانا العيد داخل

ومحتاجين تبرعات للفقرا

عشان نسعدهم معانا فى العيد

وكل المعلومات فى البوستر

وكله فى ميزان حسناتكم

باذن الله
والارقام اهى عشان لو مش واضحة
0140207015
0140207016
0552385178


الأربعاء، 20 أكتوبر 2010

جدى..


نفسى اقولك وحشتـــــــــــــــــــــــــــــــنى اوى

ومحتاجاك اوى....نفسى احضنك اوووووى

نفسى اخد من ايدك وردة

نفسى ارجع احس بالامان...

انت عارف انك من بعد ما بعدت عنى وانا معنتش

بحس بالامان...

تعبانة اوى من غيرك..اصلى كنت بحبك اوى

....
لو مقدرتش تضحك متدمعش ولا تبكيش وان مفضلش معاك غير قلبك اوعى تخاف..مش هتموت...هتعييييييييش
..........

دخل علينا والفرحة تملأ قلبه واسرع الى مقعدك

ليخبرك بما اسعده لتفرح معه

ولكنه لم يجدك...

تذكر انك فارقت الحياه ولم تعد موجودا

فصمت وابتسم ..ربما تذكر ابتسامتك فابتسم لك

وكأنه يخبرك بما اسعده

وبعدها اخد نفسا عميقا وعادت لملامحه اثار الحزن

التى لم تفارقه منذ رحلت...

..........

ناس كتير اتغيرت يا جدو وانا طلعت ساذجة فعلا

وكل ما بيعدى الوقت بفتكر نصايحك ليا

بجد وحشتنى اوى ..رحمك الله جدى العزيز

...............
ما زال فراقك يؤلمنى...حقا افتقدك

الخميس، 14 أكتوبر 2010

سمية وخالد...حرام يا بلد


سمية اشرف

هى احدى ضحايا كلاب حرس الجامعة

وكان من قبلها خالد سعيد على يد مخبر وضابط

ومازالت هذه المؤامرات قائمة

ونحن ما زلنا صامتون

ولا توجد رد فعل حقيقية

بل ان هناك من لا يعلمون بما يحدث ابدا

....

سمية اشرف اتضربت واتشتمت من حرس الجامعة

والفيديو موجود فى كل حتة لو كتبتوا سمية اشرف

على اليوتيوب او على جوجل حتى هتلاقوه

..........

كلابك كتروا يا مصر....لميهم بعد اذنك

... اعذرونى على شتم هؤلاء ال....

ولكنى لا استطيع تملك نفسى

بس الظلم ليه نهاية..

حسبنا الله ونعم الوكيل

الخميس، 7 أكتوبر 2010

شكولاتاية حبنا..


كل ما اجيب شكولاتاية وافتحها عشان اكلها


افتـــــكرك....


وافتكر اد ايه بتحبيها ...فاكل نصها واعين نصها التانى


ليكى ....


وااجى على اخر اليوم واحس انى جعانة


فافتح التلاجة واكل النص بتاعك..^__^

الخميس، 30 سبتمبر 2010

...


مكنتش اعرف ان الوحدة حلوة اوى كده

وان ميزاتها اكتر من عيوبها...

بقيت بستريحلها اوى وبحس انى فيها على طبيعتى

مش محتاجة اقنعة قدام البشر

مش محتاجة اتلون بالوان مش الوانى

مش محتاجة اركز فى كلامى ولا تصرفاتى

مش محتاجة حدود لانفعالاتى

عشان كده بدأت احبها واستريحلها

واحس بانها نعمة مش نقمة

...........

حقا كسرت حبها فى نفسى

لانها خالفت ذلك العهد الذى كتبته على نفسها

واشهدتنا عليه

وعندما قابلتها وجدتها سعيدة بذلك

فنظرت اليها نظرة تعجبية كبيرة

فسألتنى بكل سذاجة..مالك يا سارة؟؟

...لا لا مفيش حاجة

وكأنها لا تدرى ماذا فعلت ...بنفسها وبى

..............

msg for S

اعلمى انه خير وان الله لن يضرنا ابدا

او يمنع عنا خيره

فنحن عباده

والله رحيم بعباده ...يحبهم ويحبونه

لذلك فاصبرى.....:)

.....................

الضربة اللى مبتموتنيش...بتقوينى

او ربما تجعلنى فى عداد الموت وانا على قيد الحياه

.......................

رغم حبى للوحدة الا اننى اكتشفت انى

احبك اكثر

وانتظر مكالماتك لانك الوحيدة القادرة على اخراجى من

وحدتى

فانتى تشبهينها فى الكثير من جوانب

فمعكى لا احمل اى اقنعة او الوان

R

الخميس، 23 سبتمبر 2010

جدى


كلما مرت علي الايام ازددت شوقا اليك

وادركت كم كنت تملأ علي حياتى

..

ذهبت وتركتنى اعانى.....وحدى

واعلم جيدا انه لا مجال للعودة

فالموت ... لا يعطى اى امل فى اللقاء

......

ما زال بداخلى اثر ابتسامتك الرقيقة

التى تغمض فيها عيناك من كثرة سعادتك

.......

ما زلت اغمض عيناى املا ان اقابلك فى احلامى

فتأخذنى فى حضنك وتحتوينى وتقبل جبينى

وتدعو لى

..........

رحمك الله جدى العزيز

الخميس، 2 سبتمبر 2010

انا وجدى 1


تذكرت ذلك اليوم الذى سبقتنى فيه الى

- الروف - لتزرع ما جلبته من بذور جديدة

فلقد كنت تعشق الزرع والخضرة والجمال

وتحب كل ما يجلب هدوء وسعادة نفسية

...

صعدت الدرج لاشاهدك وانت تزرعها

فوجدتك تضع فى يدى احدى البذور

وكانت لفاكهة المشمش

وقلت لى..يلا يا سارة ازرعيها

عشان دى تبقى شجرتك

وتخلى بالك منها وتسقيها كل يوم

.. بس انا مفهمتش ليه قلتلى كده

وليه اصريت على كده

....

كنت غبية اوى ساعتها لانى مفكرتش فى غير

انى ايديا هتبقى كلها طينة

وانى هنهدل الدنيا

تفكيرى كان محدود ساعتها

........

وقدام اصرارك يا جدى خدت منك البذرة

وزرعتها

وادركت بعدها

انك كنت بتعلمنى الانتماء

وان الارض اللى زرعتها عمرى ما افرط فيها

واحافظ عليها

وكنت عايز تقولى اصبرى

ومتستعجليش

وكنت عايزنى اكمل المشوار من بعدك

...........

وبعدها قعدنا نتكلم سوا وقمت مسكت

ورقة العنب الدبلانة وقلتلى

بعد تنهيدة....

الزرع بيزعل على اصحابه

وبيحزن لفراقهم

مامتك هيه اللى كانت واخدة بالها

من العنبة دى ولما سافرت

العنبة دبلت وزعلت على فراقها

..

وعدت الايام يا جدى ولما مت

لقيت النخلة اللى كنت زارعها فى

البلد وقعت جذعها

ودبل البلح...ساعتها فهمتك يا جدى

.....

كنت بتعلمنى بالمواقف مش بالكلام

احببتك كثيرا وما زلت احبك

رحمك الله جدى الحبيب

...

كانت هذه اولى حلقات انا وجدى

التى احكيها عن جدى

من باب اذكروا محاسن موتاكم

ومن باب الفضفضة

الأحد، 29 أغسطس 2010

مات حبيبى


بسم الله الرحمن الرحيم


توفى الى رحمة الله تعالى


جدو فوزى الشامى


جدى حبيبى مات


ولقد اصبحت يتيمة من بعده


وانا اعنيها حقا


فلقد كان امى وابى


وكان اخى وصديقى


كان احن شخص عرفته فى دنيتى


كان كل حاجة حلوة فى حياتى


...


قلى يا جدى


لما اكون تعبانة ومهموهة اروح لمين


لما احس بالخوف والضعف انام على فى حضن مين


لما توحشنى اعمل ايه؟؟


...

قلى يا جدى


لما اتكرم فى المدرسة


واجرى على البيت فرحانة بالشهادة


اقول لمين وافرحه معايا ؟؟؟


ومين هيطلع 10 جنيه من جيبه ويديهالى؟؟


قلى يا جدى


ليه سبتنى لوحدى؟؟؟


فاكرنى هقدر على الدنيا لوحدى!!!!


لا يا جدى دنا والله طلعت اضعف من كده بكتير


محتاجة لحضنك اوى


وطبطبتك عليا


محتاجة لنظرة عينك اللى كلها امل وتفاؤل


محتجاك يا جدى


....


الله يرحمك يا جدى ويحسن اليك


الحمد لله نحتسبها حسن خاتمة يا جدى


انك مت وانت نازل تودى الزكاه


وكنت متوضى ومصلى الضهر قبل


ما تنزل


وغير ده كله مت يوم الاتنين وكنت صايم


وده اللى مريح قلبى ومسكنه


........


البقاء لله

الأربعاء، 11 أغسطس 2010

حملة جديدة ووداع


السلام عليكم ورحمة الله وبركاته

كل سنة وانتم طيبييييييين

رمضان كريم....^_^

...

بدأ رمضان ولكن هل بدأ

حقا فى داخلنا.....

لو سألنا نفسينا ليه مبدأش جوانا

ومش حاسين بيه

هنلاقى اسباب كتير

منها

1- احنا مستعديناش فى شعبان كويس

مكنش شغلنا فيه على الوجه الاكمل

2- داخلين رمضان مش محددين هدفنا

مش عارفين احنا داخلين ليه

مش كاتبين ال 30 دعوة بتوع الفطار

مش محددين 5 او 6 دعوات ندعى بيهم

طول الشهر زى ما الصحابة رضى الله

عنهم كانوا بيعملوا

.....

الحاجات دى منها اللى فات ومش هنعرف نعمله

ومنها اللى لسة قدامنا فرصة نكمله

مش عازين نقف ونتكاسل

مفيش وقت

رمضان بيجرى بجــــــــــــــــــــــــــد

....

حملتنا بقى السنادى

حملتنا مقاطعة مسلسلات رمضان

لو انتى قوى الارادة هتقدر على نفسك

وهتقدر تقاوم

لو انت ضعيف..يبقى معطلكش بقى

احنا شغلنا مع الكبار بس..^_^

...............

برامجنا فى رمضان

صراحة دى اكتر برامج بحبها وهتابعها كلها ان شاء الله

1- مصطفى حسنى فى برنامج مدرسة الحب

وبييجى على اقرأ الساعة 10 وتلت بالليل

2- عمرو خالد فى برنامج رحلة للسعادة الساعة 5 ونص العصر على المحور

والساعة 1 الظهر على قناة الرسالة

والساعة 4 صباحا على الرسالة بردو

3- معز مسعود فى برنامج الطريق الصح مع معتز الدمرداش

4- الشقيرى فى خواطر 6 على
mbc
.......

واخيرا وليس اخرااااا

فرحة بعودتى الى ارض الوطن يوم الجمعة ان شاء الله

دعواتكم ان اصل بالسلامة

واخييرا سأعود الى بلــــــــــــــــدى الحبيبة مصر

...احن وكم يؤرقنى حنينى حقا...

بس ده معناه انى رايحة للدروس عععععععع

وهبدأ مرمطة ان شاء الله لانى فى ثانوية عامية عقبال

عنديييييييكم

وللاسف متابعتى لمدوناتك هتقل

بس ان شاء الله هحاول اخليها مش تقل اوى

ولكن دعواااااتكم بقى ومتنسوش حملتنا وبرامجنا

وتعالوا زورونا..^_^

الاثنين، 9 أغسطس 2010

رمضان كريم..^_^


كل سنة وانتم طيبين يا احلى مدونين
وحوى يا وحوى ايوووووووووحة
وكمان وحوى ايوووووووووحة
روحت يا شعبان..جيت يا رمضاان
وحوى يا وحوى ايووووووحة
....
^_^..انه رمضــــــــــــــــــــان
متضيعش ولا فسوة فيه
محدش عارف ربنا هيعيده علينا تانى ولا لأ
...
رمضان كريم

الخميس، 5 أغسطس 2010

حتى لا تموت الروح


حتى لا تموت الروح

رواية اسلامية رومانسية كما يطلقون عليها
..
رواية لزوجين وطريق كفاحهم من قبل زواجهم

حتى وفاة منال...التى توفت بمرض خبيث
...
رواية مهما قلت فى وصفها فلن اوفيها حقها

فهى حقا اثرت فى كثيرا وجعلت دموعى تنساب

على خدودى كأنها - حنفية مية مفتوحة -

لاننى للاسف اعتدت ان تكون نهاية الافلام

هي رجوع الحبيبين الى بعضهما

ولكن - حتى لا تموت الروح - لم تنتهى بالعودة

وانما انتهت بالفراق ..انه الفراق الابدى

......
مش عايزة اتكلم عن الرواية كتير

لانها محتاجة تتقرى مش ينفع حد يحكيلك عليها

بس عايزة اتكلم عن اثرها عليا

.. لقد ثبتت بداخلى مبادئ اوشكت ان اكسرها

لقد اثبتت لى حقا ان المادة ليست كل شئ

ولكنها ليست شيئا اساسا...

علمتنى ان من يصبر ينال

وصراحة من بعد ما قريت الرواية

قررت قرار هام معرفش ده من تأثير الرواية

ولا من تأثير مفاهيم جوايا

المهم انى قررت انى اقفل قلبى بالضبة والمفتاح

لاى حب حرام وانتو فاهمين كويس قصدى..^_^

وان مش كل من هب ودب ينال شرف اعجابى بيه

وده مش غرور ولكنه ايمانى بان مشاعرى

وقلبى هو اهم ما املك

وان قلبى لن يملكه سوى ربى

وان حبى لن يكون الا لشخص واحد فقط

عندما يحين وقته..

ولن ادع قلبى طليقا

سأقيده..حتى يستريح فى المستقبل

سأحافظ على مشاعرى واجعلها نقية رقيقة

بيضاء

ولن اعرضها لجرح او كسر من اي من كان

سأبقى مريمية..
..
البوست كاتباه بعد انتهائى من قراية الرواية
مباشرة فممكن يبقى فيه تضارب فى الكلمات
او حبة لغبطة نظرا لنهاية الرواية المأساوية

الاثنين، 2 أغسطس 2010

الدنيا لسة بخير..^_^


كان يتجه للمسجد ليصلى العشاء

وكاد ان يدخل المسجد الا انه وجد شابا

واقفا امام المسجد...

فوضع يديه -الكبيرتين حقا فلقد كان عملاقا-

على كتف ذلك الشاب برفق وحنية

وقال : ما تيجى تصلى معانا يابنى العشا فى المسجد

وابتسم له
.......

لم انتظر لارى بقية الموقف فقد كنت كالعادة - مستعجلة -

ولكن ما لفت نظرى حقا

هوه ان ذلك الرجل كان ملتحى

مهو ملتحى اهو يا رداااالة وكويس

اصل الاعلام والناس ادونى فكرة ان الملتحين دول

خط احمـــــــــــــــــــــــــــــــر

وانهم متعصبين وانهم مش عارف ايه ومش عارف ايه

ومش عارف ايه... ما بالراحة عالخلق شوية

...

عجبنى جدا الموقف ده وحسيت ان المسلمين لسة فيهم خير

وان الدنيا لسة فيها ناس طيبة وكويسة

وطول ما الناس دى لسة موجودة

فالدنيا لسة بخير....^_^


الجمعة، 30 يوليو 2010

يارب


اسألكم الدعاء...

الخميس، 29 يوليو 2010

...

حوار بين عقلى وقلبى

مش قادرة افهم ليه بتعمل معايا كده؟؟!!!

...ممكن تبقى هيه متضايقة ....

بس ليه مقالتش؟؟

...منتى يا سارة متحبيش ترغمى حد انه

يحكيلك زى مانتى مبتحبيش حد يرغمك

على حاجة

بس دى مرايتى وصحبتى واختى

ولما بتكون جوايا اى حاجة بقولها

حتى لو حاجات عادية

...ممكن تبقى هيه صاحبتك بس انتى مش صحبتها

لأ ازاااااى هيه قالتلى اننا صحاب

واخوات كمان

...انتى طيبة اوى يا ياسارة هوه اى حد يقولك

اى حاجة تصدقيها

يعنى ممكن تبقى قالت كده عشان متكسفنيش؟؟؟

...اه طبعا مش بعيد

لا يا عقلى انت اكيد مش فاهم

...انتى اللى مش حاسة انك مجرد حد عادى مش مميز

فى حياتها

انت مش فاهم صدقنى ..بكرة تفهم

...افهم ايه بس يا سارة

احنا بيننا عهد ولو مكنتش وافقت عليه كنت ممكن اصدقك

...وانتى شايفة انها عملت بيه؟

اسسكت بقى معرفش معرفش انت ليه عايزنى ابعد

انا مصدقت الاقيها

...يمكن هيه مش مرحبة بيكى بس مش عايزة تجرحك

بس انا ..... انا...ايه اللى بتقوله ده

...نفسك تقولى حاجة؟؟

نفسى اقول حاجات بس هيه تسمعنى

نفسى اقولها انى حبيتك اوى ومصدقت لقيتك

لانى لقيت اختى لقيت الحد اللى شالنى فى حاجات

كتيرة اوى..لقيت الحد اللى احتضنى فى مواقف

معرفش كنت هعمل فيها ايه لو كنت لوحدى

لقيت النور اللى خد بايدي بعد ما كنت فى ضلمة

ولوحدى

بس انا مش عايزة اتقل عليكى فى حياتك

يكفينى انى اشوفك مبسوطة وفرحانة

خلى بالك من نفسك ......

صدقينى مش عارفة هوه في ايه

ولا الدنيا مالها ولا انا فاهمة غلط

ولا صح

صدقينى مش عارفة فين الصح من الغلط

سامحينى لو كنت غلطت فى حقك فى يوم

ولو كنت عملت فى يوم حاجة تفرحك

مكنتش بكون عايزة مقابل غير انى اشوف

ابتسامتك وفرحتك فى عينيكى

بس...

...خلصتى كلامك يا سارة

مهما قلت مش كفاية بس بشكرها على الايام

الحلوة اللى قضيناها مع بعض

همه مش ايام همه سنين

...متستعجليش يا سارة ممكن تبقى فاهمة حاجات

كتير غلط

اتمنى اكون فهمت غلط

اوقات بتتصرفى بغرابة وببقى نفسى افهم ليه!!!