الأحد، 24 فبراير، 2013

مالك ؟!

وانا اللى كنت فاكرة ان العيب مش فيا .. وانى انا اللى اتظلمت

بس تصدق انك طلعت صادق وانى انا اللى مستاهلش !

كل ما الواحد يكتشف نفسه ويشوف قدره فى عيون اللى قدامه

بيحس انه فعلا كان فاكر نفسه حاجة .. واتخدع 

..

اوعى تضغط عليا وتخلينى أقولك سرى العظيم .. متعرّنيش

وفى الاخر تقول معلش 

انا كدا بخسرنى وبتقتل بنظرة الشفقة اللى فى عنيك !

..

اصعب حاجة فى الدنيا ان حد يفضل وراك لغاية ما يوقعك

عشان اول ما تقع يكون اول واحد يمدلك ايده 

ويكون ليه فضل عليك انه قومك !! .. 

..

وانا كل ما بقرب بكون خايفة تحرقنى .. سامحنى لما أتردد

عشان بخاف .. وهفضل اخاف 

..

كل يوم بتقرب فيه منى بتكتشفنى اكتر وبيبانلك كل اللى جوايا

أوقات بتصعب عليا .. بحس انك عايز تبعد بس مش عارف

تعبت من خوفى عليك منى .. أرجوك لو تعبت منى ابعد 

وانا هفهم .. 

سامحنى على كل شئ عملته فيك .. وسامحنى قبل الرحيل

..

نفسى ابطل عياط بعد كل حاجة حلوة بتحصلى فى حياتى

نفسى احس السعادة بجد .. 

..

جينا الدار نسأل عالحبايب .. لقينا الدار بتبكى عاللى غايب

.. 

جدو .. مفتقداك أوى :( ربنا يرحمك يارب

الأربعاء، 13 فبراير، 2013

ياللى بتوجعنى ..



وأنا اللى قولتلك قبل كدا إنى مبعرفش أحافظ على حد

حتى لو كنت بحبه ...

دايما نصيبى كدا .. كل ما أحب حد أضيعه

...

كنت بس عايزة أقولك انك وانت بتعاتبنى كنت عايزة أرمى نفسى جوا حضنك

وأعيط .. 

....

نزلت من عندك , مشيت , وصلت لحد البيت  .. 

مش عارفة أروح , عنيا بتدمع , وبدارى ..

قررت أرجع تانى يمكن أعرف أعيط قدامك , شوفتك , وقفنى كبريائى وحبست دموعى 

فرجعت زى ماجيت ...


...

كفاية تقول مش فارقة

لأنها المرادى فرقت معايا أوى
...

وانا اه بخاف ..

بخاف أوجعك فبوجعك .. بخاف أبعد فببعد .. بخاف أخذلك فبخذلك

ممكن بقى بدل ما تعاتبنى على خوفى .. تعلمنى ازاى مخافش ؟
...

احساس انك مش فارق مع حد بتحبه .. اكتر شئ يخليك تبعد

...

كل شئ كرهته فيكى .. ربنا ابتلانى بيه 

سامحنى يارب ..

الاثنين، 4 فبراير، 2013

يا الله ..




عندما تتشوه الارواح بالخطايا والذنوب فلا تخجل من عصيانها

حينها تستلذ بالمعاصى وترضى العباد على حساب الرب

فتُحرم من القرب ... ويبدأ القلب الحى فى الخضوع 

ذنب هنا .. ذنب هناك .. بلا حياء

والقلب يتلوث بسواد ما اقترفنا .. 

ويصيبه الذل .. ذل للمعصية التى لا يقوى على مجابهتها

فيغرق فى بحر الشهوات ويتعفن !!

...............

يارب ضاقت بى الدنا وأنت وكيلى وربى الكريم

فتول أمرى وارضنى وارض عنى يا الله !