الأربعاء، 10 ديسمبر 2008

انى غاضبة




بسم الله الرحمن الرحيم


كل سنة وانتم طيبين


يارب تكونوا كلكم بالف خيير وصحة


ندخل بقى فى الموضوع


انى غاضبة ....


فعلا والله لقد اصبح الغضب يملأنى


كلما احاول ان اخرج


اكييد انتم مستغربين


وديه حاجة طبيعية


بس صدقونى فعلا


شئ يغضب


لما تكونى ماشية فى الشارع فى امان الله


وتلاقى المعاكسات وال.... وغيره وغيره


والشباب خلاص فقدوا معنى النخوة والرجولة والشهامة


بالزمة مش حاجة تغضب


ولا لما تحصل سرقة او حاجة فى الشارع


والناس تقعد تتفرج ومش بتعمل حاجة


مش ديه باردو تبقى حاجة تغضب


للاسف


لقد انتشر مرض فقدان الشهامة والرجولة والنخوة


عند الشباب


للاسف


كل هذا بسبب البعد عن الدين


ولقد اصبحت المعاكسات شئ عااادى جدا عند الشباب


واللى مش بيعاكس بيبقى شخص منبوذ


لا وايه سعات الاهل بيشجعوا اولادهم كمان على كده


والله


الواحد بقى بيخاف يخرج


ويخاف يتعرض لاى حاجة


للاسف


بقينا بنمشى فى الشارع خايفيين من بعض


نفسى


والله نفسى


نرجع احسن من كده بكتيير زى زمان

هناك 11 تعليقًا:

mohamed ghalia يقول...

عندك حق والله
شبابنا رايح لفين مش عارفين
ربنا يهدى
اللهم اهدى قومى فإنهم لايعلمون
فى حفظ الله

حسن حنفى يقول...

للاسف مش عاد فيه نخوه

ربنا يهدي الجميع

.ılı. 3AbdAllah.ılı. يقول...

ده فعلا موضوع مؤسف اوى يا ريحانة بس لازم نخرج ونواجه الناس

لو كل واحد فين قال كدة يبقى احنا سلبيين

انتى تخرجى مع صحابك كمان واى حد يعاكسك تهزئيه مش شرط تردى عليه بس يعرف ان ده غلط

وربنا يهدينا ويهدى الجميع

ريحانة الاسلام يقول...

اخى فى الله محمد غالية
جزاك الله خيرا على المرور
وللاسف الشباب ماشيين فى طريق مسدود
يارب اهدى شباب وبنات المسلمين
وتحياتى اليك
وتسلم

ريحانة الاسلام يقول...

اخى فى الله حسن حنفى
جزاك الله خيرا على المرور
وفعلا لقد ضاعت النخوة
واتمنى ان يهدى الله المسلمين جميعا
وتحياتى اليك
وتسلم

ريحانة الاسلام يقول...

اخى فى الله عبد الله حسنى
لقد اعجبتنى حقا مشاركتك
ولكن
ازاى انا هرد عليه واهزؤه
اصلا مجرد الرد عليه بيفتح له مجال انه يعاكس تانى ويتكلم تانى
المفروض ان اى شاب كويس لما يشوف بنت بتتعاكس او حاجة يقول للى بيعاكس
احترم نفسك وده على الاقل
وجزاك الله خيرا على المرور والتعليق
وتحياتى اليك
وتسلم

ذات النطاقين يقول...

اولا : كل سنة وانت طيبة يا ريحانة ..
ثانيا : معاكي حق .. موضوع المعاكسات ده بقي شئ مقرف

مش هتصدقي .. انا مرة لاقيت واحد بيعاكس واحدة منتقبة

بيعاكس ايه انا مش عارفة
.. بس ده برضو مش سبب انك ما تخرجيش
المهم ما تخرجيش بالليل متأخر

علي فكرة في حملة اسمها احترم نفسك علي الفيس بوك وجت علي العاشرة مساءا عشان يمنعوا او يقل موضوع المعاكسات ده

و تقبل الله منا و منكم

ريحانة الاسلام يقول...

اختى فى الله ذات النطاقين
جزاكى الله خيرا على هذا التعليق
اولا وحضرتك طيبة
ثانيا انا مش عارفة اقول ايه الصراحة حتى المنتقبات!!!!!!!!
وحتى يا اختى مش بليل ده فى عز النهار والله
والحمد لله ان فى حد بدأ يتكلم
وربنا يوفق الحملة دى يا رب
وفعلا نورتى المدونة
وتحياتى اليكى
وتسلمين

روح الاسلام يقول...

بجد مش عارفة أقول اية لكن المعاكسات دى فعلا بقت حاجة تقرف دة تخيلى يابنتى والله شفت واحدة ماشية مع باباها وواحد عاكسها وباباها ماشى جمبها عادى جدا كأن شيئا لم يكن والله انا كنت هاتجنن وقعدت أقول فى نفسى الراجل دة ماعندوش دم بجد دة يمكن انا كنت متدايقة أكتر منه..وباعدين انا أو انتى لو أى حد عاكسنا مثلا أكيد ماهانردش علية لأننا متربيين كويس وعارفين حدودنا.. لكن للأسف فية بنات تانية بتبقى فرحانة بموضوع المعاكسة دة ويمكن كمان بيبقو نازلين الشارع علشان كدة ويمكن دة اللى مخلى الشباب يتمادو فى حكاية المعاكسة دى
بجد ياريحانة تسلميلى على طرحك للموضوع دة لأنة فعلا بقة موضوع مهم وبجداسفة جداعلى الاطالة

ريحانة الاسلام يقول...

اختى وحبيبتى فى الله روح الاسلام
لقد اعجبنى حقا رأيك
وفعلا انا مش عارفة النخوة راحت فيين
وصدقينى البنات المتربيين كتيير
ونفسنا يوضع حد للحكاية ديه
مهو لو كان عندهم دين او اخلاق
مكنشى ده هيحصل
والله الموضوع ده طويل وصعب ان الواحد يقصر فيه
بس ربنا يهدى شباب وبنات المسلمين
وميرسى يا قمر
شرفتينى فعلا فى المدونة
وتحياتى اليكى
وتسلمين

Just Smile يقول...

السلام عليكم

انا مشفتش موضوعاتك القديمة وقلت ابص بصاية ومندمتش:)

موضوع جميل اوي بس بصي متبصيش اوي يعني
هوا بقى شيء غريب جدا من شباب تافه نوعا ما مش لاقي حاجة يعملها فده بيكون نوع من التباهي ادام صحابهم التانين او ظنا منهم انهم كده بيبقوا سيبيشيال يعني
لكن في كل الاحوال الاصول واحدة وده غلط ،بس بعدم ردك ع الشخص عديم الاخلاق اللي بيعمل كده ده بيكون أحلى رد عليه "الصمت" اكنه دبانة بتزن وخلاص .
يللا سلاموزين يا أختيتي