السبت، 5 مايو 2012

يوم ما مات ..





التليفون بيرن .. " آلو .. "

" أيوه يا سارة افتحوا الأخبار بسرعة شوفوا اللى بيحصل فى بورسعيد .. "

_ ناس نازلة من المدرجات على الملعب ، فوضى فظيعة ، أخبار عن ناس بتموت _

" هو فى ايه ؟؟ "

" بورسعيد مولعة ، الجمهور بيقتل فى بعضه "

" انتى بتقولى ايه ؟؟ "

_ القنوات كلها بتتكلم عن أسماء شهدا وجرحى والناس بتتصل تصوت فى البرامج _

دخلت الفيس يمكن أقدر افهم حاجة ..

- الساعة 12 او يمكن 2 بالليل  وانا بشوف الاخبار-

" مين دا .. محمود!!! "

_ بيج شرقية توداى على الفيس منزلة صورة محمود وكاتبة فوقيها الشهيد محمود 

سليمان _

جاتلى حالة من الصدمة ، مش قدرت أصدق ، لغاية دلوقتى مش مستوعبة الموضوع

" آلاء ، هو دا محمود اللى معانا فى صناع ؟ "

" هو ..."

.............................. :(((((

بعد نص ساعة على الفيس

" د . إسلام فريد وكذا حد كتب :  فى أخبار ان محمود عايش وإنه مُصاب .. ادعوله يا 

جماعة "

حاولنا نصدق ، كنا بنتعلق بأى قشاية ،اى اشاعة ، يمكن تطلع صح

.. الفيس كله بقى اسود .. الكل عامل حداد

------ محمود مـــــــــــــــــــــــــات -----

 _محمود سليمان ، صانع حياة ، طالب بهندسة الزقازيق، ظهرت نتيجته بعد 

استشهاده بشهر او يمكن

شهرين ، أحب أفرحكم ،، محمود نجـــــــــــح :) _

--------

يومها محدش نام ، محدش كان مستوعب ان واحد كان جنبنا وشايل عمود من 

عواميد فكرتنا استشهد

أيوه استشهد ، محمود كان من الناس اللى شاركت فى الثورة وكان من الأولتراس 

وكانت باينة

اوى ان أمن الدولة كان بيصفى الناس اللى شاركت فى الثورة ومن أهمهم الأولتراس

-------

تانى يوم اتقابلنا ، كل واحد فينا نازل من بيته ساند نفسه بالعافية

الوشوش صفرا ، والايدين بتترعش ، والعيون بتلمع من كتر الدموع اللى محبوسة 

جواها

- شباب وبنات صناع الحياة ، ثورجية الزقازيق وكل اخوات محمود -

أول ما اتقابلنا حسينا بالقهـــر ، قعدنا نعيط ، ونصبر بعض

كل بنت فينا كانت حاسة ان اخوها مات

وكل ولد كان بيحاول يمسك دموعه قدامنا بس مقدرش ..

عمرى ما شفت مظاهرة زى دى ..

بعد ماجابوا صور محمود .. مشينا لفينا البلد دى حتة حتة

كنت شايفة الحزن فى عينين كل واحد فينا .. محدش قدر يمسك دموعه فى اليوم دا

.. اتقهرنا .. اتقهرنا بالأوى

ماشيين ، رافعين صورك ، كنت حاسة بفخر انى رافعة صورتك ، كنت

حاسة انك معانا ، ماشى جنبنا ..

عدينا من تحت بيتك وبدأنا الهتاف ..

" محمود .. فى الجنة ،، محمود فى الجنة "

" الدية للولية .. أم محمود قوية "

" وحياة دمك يا محمود .. ثورة تانى حتى الموت "

" يا عسكر لِمْ فلوسك .. أم محمود هتدوسك "

هتاف طالع من قلوبنا وسط الدموع .. وكل الجيران واقفين يهتفوا ويعيطوا معانا ..

كان يوم حزن ، يوم ما اتقتلت غدر يا محمود .. الله يرحمك 

الشوارع والحيطان وكل شبر كان بيبكى  ، ولفترة كان الاسود لبسنا 

وكان الحزن والبُكا هما لغتنا ..

تانى يوم بعد المذبحة ، كان فيه واقفة صامتة لكل صانعي الحياة على مستوى 

الجمهورية

عشان اللى ماتوا فى بورسعيد وخصوصا عشانك يا محمود :)

عارف ،، حسيت فى اليوم دا انى فى عزاء ملكى ، كنا واقفين تحت الجمعية  ، 

شايلين  صورك

، ساكتين ، بندعيلك .

تالت يوم ، صورك كانت فى كل مكان فى الزقازيق ، عالحيطان وفى القلوب ،وفى كل 

شبر ،

حتى فى الميدان ،، يا بختك ياعم :)

كتبوا عالشارع بتاعك " شارع الشهيد محمود سليمان " وعلقوا عليه يافطة 

مكتوبالك

كتبوا عليها " مات المناضل المثال ،ياميت خسارة عالرجال "

وبعد اسبوع ، دخلت الجمعية ، قلبى اترعش ، صورك فى كل حتة فيها ،

شعارات ، صور ، هتافات المظاهرات ، ورسايل ليك ..

محدش مكنش بيدعيلك :) ، يابختك يا محمود سبقتنا للجنة ..

..
عارف يا محمود انا بكتب عنك ليه دلوقت ! 

لإنى منستكش ، اصل انت مش حد مات وعيطنا عليه شوية وخلاص

لا يا محمود ، انت فكرة ، والافكار لاتموت ..

مش هنسيب حقك يا محمود وعمرنا ما هننساك ..

الى لقاءٍ أتمنى ان يكون قريبا ..


هناك 7 تعليقات:

Radwa Tarek.. يقول...

اه
وجعتي قلبي

Nour يقول...

في الجنة ان شاء الله وان شاء الله ربنا يقدرنا نرجعلهم حقهم

اول مرة اسمع كلام عن حد مات من حد كان قريب منه او يعرفه .. ربنا يصبركوا ويصبر اهله ويصبرنا كمان

دعاء العطار يقول...

:(

يابخته فعلاً

غير معرف يقول...

اذكر اننى لم اعرفه يوما ...ولم اراه من قبل...ولكنى بكيته كأنه اخى بل واكثر
فما بال من يعرفونه!!؟
رحمه الله
مــريم

EZ Small Business Center يقول...

مجهود رائع وممتاز، ولكن هل تعلم انه يمكنك الاستفاده منه وكسب المال والأرباح من هذه المدونة عن طريق عرض بعض الإعلانات وذلك من خلال مشاهدة افضل كورس في الربح من المدونات والإنترنت على موقع كايرو هوم بيزنس كورس العمل من المنزل و الربح من الانترنت

غير معرف يقول...

بجد تحفة راااااااااااااائعة ماشاء الله ان شاء الله محمود فى الجنه ربنا يصبر اهله يااااااارب :"( :'( :'( :'(

بيطرية ومش بايدى يقول...

ابكيتنى يا سًارتى

محمود سليمان عايش فى الجنة