الخميس، 23 أغسطس 2012

لجلك هجرنى منامى ..


" لجلك هجرنى منامى 

وجفيت فيكى كل صاحب .. "

صوتك وانتى بتغنيهالى مش بيغيب عنى

وطول مانا ماشى لوحدى عمال أدندنها

كل اللى كان بيننا فى يوم انتهى يوم ما قلتلك " انا بكرهك.. "

انتى عارفة انى ابدا مكنتش اقصدها بس انتى وصلتينى لإنى اقولك كده

عارفة .. بتوحشينى

كل شئ فيكى بيوحشنى وخصوصا عينيكى ..

قلبك , رسايلك , كتبك , رسوماتك , اغانيكى , حتى هداياكى

...

لساكى مش حاسة بالوجع ؟

وايه يفيد الوجع بعد الفراق ؟!

الفراق , عارفة يعنى ايه الفراق ؟

يعنى لما أتعب واكون محتجاكى جنبى أتعب اكتر لانك مش هنا 

ولا هتكونى تانى هنا

يعنى لما افرح واجرى عليكى احضنك ألاقى ..سراب

يعنى لما أنطق اسمك أقول بعدها .. كانت حبيبتى

:((

...

خايف أقابلك فى يوم صدفة وتتقابل عيوننا 

ساعتها هتشوفى الضعف فى عنيا بعد ما حاولت أخبيه سنين ..

خايف من ضعفى أرجع اقولك سامحينى .. واموت كرامتى

خايف أسمع اغانيكى وافتكرك

خايف أقابلك بعد عشرين سنة وتسألينى انت مين ؟
....

ليه يا دنيا كل ما تدينى حب يكون حب بـ وجع !!

.. اول سطرين جزء من كتاب خارطة الحب لأهداف سويف

هناك 4 تعليقات:

Nour يقول...

الفراق , عارفة يعنى ايه الفراق ؟
يعنى لما أتعب واكون محتجاكى جنبى أتعب اكتر لانك مش هنا
ولا هتكونى تانى هنا
يعنى لما افرح واجرى عليكى احضنك ألاقى ..سراب
يعنى لما أنطق اسمك أقول بعدها .. كانت حبيبتى

رائعة بجد رائعة تسلم ايدك :))

~ISLAM~ يقول...

انا اتخنقت اوى من البوست

انتى فنانه ومبدعه بس صعب الاحساس

متهيألى الفراق ده حاجة بنت ..........

موفقة دايما

sara adel draz يقول...

نور

:)

ربنا يخليكى

منورانى يا قمر
:))

sara adel draz يقول...

islam

عندك حق فعلا يا فندم
وانا اسفة انى خنقتك

بس الكتابة دايما بتريح الواحد فلازم اكتب

منورنى
:)