الاثنين، 27 أغسطس 2012

أن تكون اخوانجيا ..


 بدأ الامر بحضورى لدروس دينية فى المسجد فى رمضان

انا ووالدتى 

واستمرينا عالدروس دى فترة كبيرة 

لغاية بعد كده ما بقيت بحضر دروس دينية بس فى بيت واحدة من صحباتى

كانت مجموعتنا 6 او 7 بنات

كل اسبوع بناخد درس فى بيت واحدة مننا 

وبس .. من هنا بدأت الحكاية وبدأت علاقتى بالاخوان
:)

......

اوقات بتستغربوا الناس الاخوانجية وسر تعلقهم بجماعتهم

وبتغلطوا فيهم كتير وبتقولوا عليهم قطيع ... 

ببساطة انتو مش فاهمين ليه الناس دى مترابطة اوى

هتكلم معاكم عن تجربتى الشخصية مع الاخوان وهتكلم عن حاجات

فى الاخوان محدش بيتكلم عنها لما بتيجى سيرتهم

............

مش معنى ان انا اخوانجية يبقى من حقك تشتمنى وتهيننى ومطلوب منى أسكت !!

ولو اتكلمت يقولوا شوفوا الاخوان بيقولوا ايه ؟!

بالذمة دا عدل ؟!

ومش معنى ان انا اخوانجية يعنى انا من ضمن القطيع اللى انتو مسمينهم قطيع 

رغم انهم من أكفأ الناس واكثرها مكانة واحتراما

ومش معنى ان انا اخوانجية يبقى لما اعمل اى حاجة تشكك فى نوايايا وتقول دى

مش قصدها كذا لا دى قصدها كذا وكذا وكذا

الغريبة انه إذ فجأة بقيتوا بتشتموا فى الاخوان مع انهم كانوا من اكتر الناس 

تأثيرا فى الشارع البسيط من قبل الثورة 

فى ناس كتير متأثرين بمسلسل الجماعة - اللى بيسئ للاخوان - وماشيين يتكلموا

عن الاخوان على اساس الفكرة الغلط اللى خدوها عنهم

ودا مش عدل ..لانك من المفروض انك لما تبحث فى موضوع تاخد فيه كل الاراء

وتبدأ تعقلها وتشوف مين الصح

 .......

عيلتى مفيهاش حد اخوان .. عيلتى ماشاء الله منوعة فيها كل حاجة ماعدا الاخوان...

منكرش ان جتلى اوقات كنت بتمنى فيها ان اكون من عائلة اخوانجية عشان الصراع

اللى بيننا ينتهى 

بس فى نفس الوقت وجودى فى عائلة زى دى علمنى الصبر - ايوالله - الصبر اللى 

يخليك تسمع من دا ودا ودا حتى لو كان كلامه بيحمل اساءة ليك

بس لازم تسمع وتستوعب الكل وفى الاخر كده كده مبادئك مبتتغيرش

.....

اول لما تيجى سيرة الاخوان بييجى فى بالكم المرشد ومرسى والبلتاجى وإلخ إلخ إلخ

بس انا اول ما بتيجى سيرة الاخوان .. بفتكر الناس اللى علمتى ازاى اقرب من ربنا

وازاى البس حجابى - مش شرط انى البس الخمار طبعا - وازاى اتعامل مع البشر بأخلاق

ديننا , وازاى اشتغل عند ربنا بالعمل التطوعى , الناس اللى وقفت جنبى وشجعتنى انى 

اكون انسانة ناجحة , الناس اللى كل ما افتكرهم افتكر قول الله تعالى
{‏وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ 

وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَنْ ذِكْرِنَا

 وَاتَّبَعَ هَوَاهُ وَكَانَ أَمْرُهُ فُرُطًا‏}‏

,الناس اللى كانوا ليا صُحبة صالحة دايما بدعى ربنا يرزقهالى ...

اول ما بتيجى سيرة الاخوان بفتكر أبو صحبتى اللى كل عيد كانوا بيعتقلوه عشان

ميقضيش العيد مع اسرته .. وابو صحبتى التانية  اللى كان مجهز شنطته تحت السرير

عشان عارف انهم هيعتقلوه قريب .. وابو صحبتى التالتة اللى منعوه من الترقية من

مكان شغله لمجرد انه اخوان .. وصحبتى اللى بتجيلنا الدرس معيطة عشان اعتقلوا اخوها

والمستر بتاعى اللى فى نص الحصة بييجوا يخدوه ويودوه المعتقل

وكمية المواقف المستفزة اللى بتحكيهالى صحبتى لما جولهم بتوع أمن الدولة الفجر وقلبوا البيت

رأسا على عقب وخدوا كل الفلوس واللاب توبات اللى فى البيت ورموا الكتب وهتكوا حرمات البيت

وخدوا  اى حاجة ليها تمن معاهم عشان يستفيدوا منها

..........

تفتكر لما تعيش دا كله سنين من عمرك وييجى حد بسهولة يشتم فى الاخوان هتصدقه

دانتا لو قلتلى انهم بيعملوا ايه مش هصدقك

لانى عشت جوا الناس دى وعاشرتهم واتعلمت منهم كتير وشفت فيهم نماذج كتير

مذهلة بمعنى الكلمة 

أرجوك متختزلش الاخوان فى كلمة وحشة او شتيمة وانت متعرفهمش

هناك 5 تعليقات:

Minnie يقول...

سارة, امن الدولة ظلم كل الناس اللي ضد النظام السابق مش بس الاخوان..
فلما الاخوان بيتكلموا عن انهم الوحيدين اللي اتظلموا..بيجيلي حالة من الاستفزاز تخليني حاسة انهم اتحبسوا عشان نفسهم مش عشانا احنا..المصريين..
اللي بلا انتماء..بننتمي بس لبلدنا مصر..هي دي اللي بتحركنا نعمل اي حاجة في الدنيا
انا عارفة اني كتير ضايقتك و شتمت الاخوان قدامك..و بعترف ان ده غلط..

بس انت عشتي معاهم..كأفراد
احنا بقى كثورجية لا ننتمي لجماعة الاخوان..عشنا معاهم كجماعة..
و شفنا ذل مابعده ذل..و شفنا ندالة منهم كتير..مش كأفراد..كجماعة الاخوان المسلمين في مصر
في محمد محمود و في العباسية و في..و في..
و كم تخلوا عننا في مواقف كنا في امس الحاجة اليهم و لقوتهم كجماعة كبرى و كقوة سياسية مؤثرة و كحزب معارض له وزنه و كلمته و تخلوا عننا
و احب افكرك مين اللي اتخلى عن الميدان ايام الثورة و في عز جبروت حسني مبارك..و بعد ما كل القوى السياسية رفضت التفاوض مع النظام السابق
و راحوا بكل جرأة -بل و تسمحيلي اقولك بكل بجاحة- بتفاوضوا مع النظام باسم الشعب و باسم الميدان!!!
و كان في افراد كتير من الجماعة بترفض اللي عملوه ده!
لما تتكلمي عن الجماعة بتفتكري صحابك
و انا بقى لما حد بيكلمني عن الجماعة بفتكر مستر محمد ابراهيم -بتاع الكيمياء و الاخوانجي- و هو بيقولي على بتاعة محمد محمود و رئاسة الوزراء بلطجية
و بفتكر لما مستر بتاع علم النفس الاخوانجي بيقولي ايه اللي ودا البنت اللي اتخلعت هدومها بكل جرأة الميدان اصلا؟؟ و ايه اللي ملبسها هدوم على اللحم؟؟
كل واحد شايف الاخوان من وجهة نظره..بس يا ريت كل واحد يراجع نفسه..انا بكره جماعة الاخوان المسلمين كـ قيادة و كـ مكتب ارشاد و كـ كل شخص حاول يستخدم جهل الشعب المصري في صالحه سواء في الانتخابات او في المظاهرات
و ليا صحاب كتير اوي اخوانجية بعشقهم بل و بحس ساعات اني بتطلع ليهم في لبسهم و اخلاقهم زيك و زي خديجة -ما شاء الله عليكوا-..
يا ريت تفتكري كده الشهداء اللي راحت دمائهم هدر بسبب جلسة مجلس شعب
و تفتكري ان الكتاتني لسة بيركب العربية BMW بتاعة -الريس-
Dalia Elkady

sara adel draz يقول...

داليا القاضى

اولا مبرووووووك على البلوج

^_^ ثانيا من اول ما قلتى كلمة - انا عارفة انى كتير ضايقتك وشتمت الاخوان قدامك - قلت دى داليا
ولما قريت الاسم تحت ضحكت جدا :))

اولا يا ستى انا لما اتكلمت عن ظلم امن الدولة للاخوان كنت عارفة ان مش بس الاخوان اللى اتظلموا من امن الدولة لانى عايشت الظلم دا فى صناع الحياة لانها تبع عمرو خالد وعمرو خالد ماركة مسجلة فى امن الدولة فكانوا مضيقين علينا كل الشغل ومكناش بنجيب سيرة عمرو خالد فى حاجة لدرجة اننا فكرنا نغير اسم الجمعية عشان منرتبطش بعمرو خالد ونعرف نشتغل ومنتمنعش من دخول الجامعة كصناع الحياة

ثانيا يا داليا انتى مناقشاتك معايا كانت اقل حدة بصراحة من اللى شوفته برا وأذانى نفسيا جدا ..فلا تقلقى ^_^
دى آراااااء

ثالثا هما كمان ثورجية يا داليا بدليل ان الاخوان نزلوا بصورة رسمية من يوم جمعة الغضب وكانوا فى الميدان

أينعم فى اول يومين نزل شباب الاخوان وليس القيادات ومأعلنوش انهم نازلين لانهم خافوا تحصل حملة اعتقالات جديدة عليهم ودا اللى حصل فعلا انهم اعتقلوا اكتر من 500 واحد اخوانى فى اول الثورة

وطبعا كفصيل سياسى اكيد لهم اخطاء ودى حاجة لا تُنكر وكنت انا كمان ضدهم فى الفترة دى وزعلت جدا لما منزلوش فى محمد محمود ولما البنت اتعرت

ودى اخطاء تُحسب عليهم

بس مش معنى كده يا داليا انهم عشان غلطوا فى كذا حاجة قبل كده اننا نقعد نقلل من كل حاجة بيعملوها دلوقتى او اى عمل كويس بيعملوه لان فى ناس كتير بتعمل كده اليومين دول

يعنى الوحش نقول اه وحش
والكويس نقول اه كويس

وعلا فكرة الاخوان ليهم اصلا صيت كبير فى القرى لانهم بيساعدوهم من زمان ودايما معاهم فطبيعى لما ييجوا ينتخبوا هينتخبوا الحد اللى معاهم وبيقدملهم حاجات أين كانت الانتخابات دى فى ايه لانهم فعلا عندهم نسبة كبيرة من الجهل ودا شئ لا يُنكر بردو

وبالنسبة للعربية بتاعة الكتاتنى دى اول مرة اسمع عنها .. بس مظنش انها حقيقة لان الراجل اول ما مسك مجلس الشعب مرضيش ياخد مرتب رئيس مجلس الشعب وأخد مرتب عضو عادى فى مجلس الشعب

وووووبس
^_^
المهم بقى اننا فرحانة انك نورتى التدوين

Minnie يقول...

لا ماتقلقيش انا منورة من زمان بس انت اللي مش واخدة بالك xD..
يعني انا عندي بلوج من 2 اعدادي يا 3 اعدادي مش متذكرة اوي xD..
المهم انا آسفة اني اتأخرت في الرد سافرت بقى و انت عارفة!
و بردوا بتدافعي عن الاخوان كأفراد و ليس كقيادة!..انا مش هعرف ارد عليكي طول مانت مش بتحاولي تفهمي وجهة نظري بل بتدافعي عشتان بس هما الاخوان مش عشان حاجة تانية!
و بالنسبة للأخطاء يا سارة دي مش بس تؤخذ عليهم و تقول عيل و غلط و الخرف اللي الاخوان بيدافعوا بيه عن نفسهم ده!
بل ده يخلي اي شخص متعلم و واعي يأخذ حذره منهم!..
لانهم تبع مصلحتهم! و مصلحتهم فقط!
و اه لما بيعملوا حاجة كويسة بنصقفلهم و لما بيعملوا حاجة وحشة بنقف ضدهم!
الثورجية هما اللي بيعملوا كده..اللي بيحبوا مصر بجد..سواء انتموا الى الاخوان او اي تجمع سياسي آخر او حتى افراد عاديين!
و بالنسبة لصيتهم في القرى بلاش لا انا ولا انت نتكلم عن حاجات مش عارفين نية الشخص اللي بيعملها دي ايه؟؟..
ماهو الحزب الوطني عند بابايا في البلد كان دايماً خادم الناس..اللي ابنه عايز يشتغل كان بيروح لـ زفت اباظة ده و كان بيشغله..
احنا نفسنا لما الدواء ماكانش راذي يتصرف لخالتي في مستشفى الجماعة خلينا الراجل يكلملنا الوزير -و ماخدش اي فلوس لو بتتسألي- عشان يسهل في صرف الدواء!
ابوس ايديهم بقى و انتخبهم!!!!
لا طبعاً..لانهم بيعملوا كده عشان دي حاجة سهلة جداً بالنسبة لهم..و منافعها اكتر من مساوئها..
ولا تحبي افكرك ان حسني مبارك كان بيسيب الصحفيين يشتموا فيه ساعات!..و ان ابراهيم عيسى كان مسميه رئيس البنية التحتية!..و كان ساعات بيشتموا بشتايم قبيحة!..
يعني احنا ماكوناش مكتومين اوي يعني! فمش عشان حد خدمنا خدمة نبجله بقى ولا نعبده!..
ماهم دخلوا مجلس الشعب كانوا عملوا ايه بقى؟؟؟..شتموا البرادعي و شتموا الثوار و ادعوا انهم بلطجية!..
و لما جه وقت الانتخابات..يقولك الثورة اولاً!!
بس بس بس بس و النبي
انت كده كده مش هتقتنعي انهم ناس بتاعوة مصلحتهم لان بالنسبة لك انت بتدافعي عن صحابك مش عن كيان سياسي!
و آسفة على الهجوم الواضع و الصريح في الكومنت بس صدقيني انا بكره الاخوان!

ahmed fathy يقول...

تحياتى

عبير علاو يقول...

الله ييسر