تضامنا مع اسماء محفوظ

مدونين شرفاء من اجل مصر

هكذا نحن واذا ما حدث مكروه

لأحد منا

فينبغى الوقوف ومناصرة المظلوم

وانا متضامنة معاكى يا اسماء محفوظ

وربنا يرفع عنك الظلم ياااااااااااارب

مش فاهمة بجد ازاى مدنيين يتحاكموا محاكمات

عسكرية وبتهم بجد فارغة

وازاى احنا نسكت على كده

دا ذنبنا والله عشان مكملناش ثورتنا

ولسانا فى ايد النظام القديم المتمثل طبعا

فى المجلس العسكرى وليس الجيش

ازاى بنت زى اسماء هتعمل عمليات اغتيال

!!!! بجد كلام مستفز جدا

وازاى يخدوا كلامها اللى على تويتر والفيس

ويعملوه تهم ..هبل دا اسمه!!!

يعنى لو انا قلت عالفيس انى هقتل الواد الرخم

صاحب اخويا الصغير هيقبضوا عليا!!!!

بجد الواحد شاف حاجات تشيب ولســـــه

احنا اه دلوقتى اخدنا حرية

بس حرية مقيدة يعنى ولا كإننا حسيناها

للاسف عملنا نص ثورة بس

يـــــــــــــع عليــــــــنا

.....

كلمتين على جنب

أفتقد أناس كانوا معى أمس واليوم هم فى دوامة

الحياة

ليتهم يعودون فأبتسم كما كنت ابتسم من قبل

خاص مع جدى

ازيك ياجدو وحشتنى اوى

يارب تبقى فى مكان احلى واحسن

من هنا مليون مرة

يااااااه عدت سنة على سفرك

وانا لِسّــانى وحيدة من غيرك

من غير ابتسامتك ونصايحك

وحنانك

وحشتنى قد الدنـــــــــــيا دى كلها

وقد البحر كله

وحشتنى اوى يا صاحبى ..

..

شفت ازاى فرحتك وجبت مجموع

عالى السنادى

يارب تكون فرحت بجد

..

علا فكرة جنة دلوقتى بقى عندها 3 شهور

امبارح تمتهم

وبقت امورة اوى

كان نفسى تشوفك وتشرب من حنانك

زى ما شربته منك

..

نفسى اقابلك اوى واحكيلك عن اللى حصلنا

من بعد سفرك

وتاخدنى جوا حضنك الكبير وتضمنى اوى

وتعصرنى وانزل كل همومى جواك

..

كلهم بيسلموا عليك وبيقولولك وحشتنا

اوووووووى

..

عمو جارنا صاحبك سافرلك من اسبوع

يارب تبقوا مع بعض دلوقتى وفرحانين

عارف .. عمو صاحبك لما سافرلك استغربت اوى

مكنتش اعرف انكم كانت ليكم نفس الخاتمة

فى رمضان

يا بختكم...:)

نفسى انا واصحابى تبقى لينا خاتمة حلوة كده

..

عارف .. نفسى تبقى فى الجنة وتجيلى فى المنام تحكيلى

عنها وتقولى ازاى جمالها وازاى ناسها وازاى نهورها

..

عمرى ما نسيتك ولا هنساك

ومش عنت هعيط لما افتكرك

هبتسم .. لانك بتحب كده

وهفضل ادعيلك واستناك فى المنام

..

اللهم ارحم موتانا وموتى المسلمين

ياااااااااااارب

ربنا يرحمك ويرزقك احلى منزلة فى الجنة يااااااااارب

وتشوف النبى يااااااااااااارب

وتبقى سعيد ومرتاح يااااااااارب

..

مستنياك تطمنى عليك

:)

سنطير سويا..

سنطير سويا...

ولكن هذه المرة

ليس الى روما او باريس

ولكننا سنطير الى جنة الخلد باذن الله

عقب انتهاء مهمتنا فى هذه الحياة

لا تجزعى فهى حياة قصيرة ستنتهى

الان او غد .. لا ادرى

ولكنى على يقين بان الراحة هناك

..

هناك لا يوجد ارق ولا تعاسة

هناك ارض السعادة

إلى ما لا نهاية

...

سويا سنبقى وستختفى المسافات التى

فرقتنا فى الدنيا

كم هى حقيرة هذه الدنيا

..

أوااااه يا قلبى فلتصبر

ولتتقِ الله

..

سنموت سويا شهداء

باذن الله..كما نتمنى

وندعو الله

ولن يحرمنا الله من هذه الشهادة

اذا كنا صادقين

..

لا راحة فى الدنا

فالشقاء فيها اكيد

ولربى اشتياقى ودعائى

فارزقنا يا الله جنة ونعيم

انا كدا .. اسبرايت

نظرا لكمية السهوكة والتجمل ومحاولة اظهار الواحد لنفسه فى احسن صورة

قررت انزل البوست دا

انا كدا ................... اسبرايت

^_____________^

انا كدا طويلة ورفيعة عادى يعنى

ومش كل ما واحدة تشوفنى تقولى انتى خاسة كده ليه

!!!

هو انا اصلا امتى تخنت عشان تسألونى السؤال السخيف دا

..

انا كدا عصبية وعنيدة وغيورة ومهملة ونفسى قصير

وبتفرس اوى من اللى يقولى - وانا متعصبة -إهــــــــدى

..

انا كدا مبحبش انزل صورى عالفيس بوك عشان حد يعملى

لايك او يكتبلى كومنت مكتوب فيه سوووووو نيس بيكتشر

بحس بسخافة ..!!

..

انا كدا بحب التفاصيل جدااااااااا

وبعشق الشرابات والجوانتيات والبطاطا والالوان والاقلام

وشنط المدرسة

..

انا كدا بحب البس الساعة فى ايدى الليمين وبستريح فيها

كده ومحدش يشوفنى ويقولى ايه دااااااا

هو فيه حد بيلبس الساعة فى ايده الليمين!!!!

ساعتها هيبقى ردى ....انا مع ابتسامة عريضة ^_______^

..

انا كدا مبحبش سهوكة البنات والمياصة دى

وجربت كتير اكون رقيقة كده زى

البنات الطبيعيين بس معرفتش

هههههههههه اموت نفسى يعنى

..

انا كده بحب الكوتشيات اوى والشنط اللى بتتلبس عالكتفين

عشان مريحة..ومش هيفرق معايا الشكل اوى

..

انا كده مبعرفش امشى فى الكعب العالى وكلامى كله

بالعربى مش نصه انجليزى او فرنساوى

ومبعرفش اقول مامى وبابى

على رأى مريم صحبتى .. الله يرحم ايام امى وابويا

..

انا كدا بسمع اغانى هادفة بس ومنيش منقسمة لحزب طمورة

ولا لحزب الحج ابو دياب

..

انا كده بحب الباسكت والقراية والتصوير اووووى

وبعشق السفر والموسيقى والشكولاتة

..

انا كدا على طبيعتى احلى بكتير واسعد

مبحبش التكلف والتجمل والسعى للظهور فى

صورة مش صورتى

..

انا كدا شخصية معقدة وبحب المعقدين اللى زيي

وبفكر افتح نادى واسميه نادى المعقدين

^___________^

توبة

قال الله تعالي بكتابه العزيز :

بسم الله الرحمن الرحيم

(( قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ

لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا

إِنَّهُ هُوَ الْغَفُورُ الرَّحِيمُ ))

صدق الله العظيم
...

وعد

اوعدك اننا هنفضل صحاب بجد

على الحلوة والمرة مع بعض

مهما اختلفنا واتضايقنا من بعض

مهما كبرنا وبقينا اطول من دلوقتى

مهما سبق فراقنا لقانا

مهما قابلنا ناس وحبيناهم وبقوا قريبين مننا

مهما اتجرحنا وبقينا كلنا تعاوير

مهما كبرنا واتجوزنا وبقى عندنا اطفال

رخمين ولمضين

مهما طالت المسافات والطرقات

مهما شعرنا بقى ابيض وعجزنا

مهما سناننا وقعت وشكلنا بقى مش امور

..

علا فكرة وعد الحر دين عليه

..

كان لازم ييجى اليوم ونختلف فى وجهات النظر

او فى المبادئ

بس ده مش معناه اى حاجة غير اننا لازم نوصل

لنقظة تلاقى

وحتى لو موصلناش هتفضلى احلى حاجة فى دنيتى

احلى حاجة فى دنيتى يعنى كل حاجة متساويش

عندى حاجة قدام فرحة من قلبك بحسها فى صوتك

لما تحصل حاجة تسعدك

..

مش هقولك بحـــــــــــــبك

لان اللى بيننا اكبر من الكلمة دى بكتير

:)

عالم لا انتمى اليه..

حينما تنخرط فى عالمٍ ثم تشعر بأنه ليس لك

ولستَ منه

فتشعر بالندم

تشعر بالندم على عالمٍ القيتَ فيه جميع احلامك

وصرحت فيه بطموحاتك

ثم رأيتها ترابا يخنقك

فتقرر الابتعاد والمراقبة من بعيد

لعلك تلمح نجما يلمع من جديد

فيبعثَ فى قلبك الحياه

..

حقا حاولتُ التعايش معهم فى هذا العالم

ولكنى لم اكن يوما مثلهم

لم اتمتع بصفاتهم الخاصة لاكون

مثلهم

..

هُم ... هُم

وانا لازلت انا

لم انجح يوما فى اختراق - هُم -

لاكون منهم

..

سأبحث من جديد عن احدٍ يشبهنى

يكن لى الامل

يكن لى الحياه

يكن حلمى

يكن قوتى وضعفى

يكن لى واكون له

ميصعبش عليكو غالى..

قال الشيخ الشعراوى رحمه الله

: حينما ترى المجرم يحاكم لا تنظر اليه

وتشفق عليه بل انظر الى جريمته

..

بيتهيألى العبارة مش محتاجة شرح او توضيح

والجواب باين من عنوانه

انا بس عايزة اقول كلمتين للى صعب عليهم الرئيس المخلوع

احب اقولهم

ان محدش هيحس بضرورة محاكمة الراجل دا

الا اللى صاحبه مات قدام عينيه فى المظاهرات

وهو بيحاول ينقذه ...

محدش هيحس بضرورة محاكمة الراجل دا

الا اللى ابنه نزل الصبح يقول كلمة حق ورجعتله جثتة

..
محدش هيحس بضرورة محاكمة الراجل دا

الا اللى ابوه مات برصاصة فى راسه وهو بيهتف

ويقول كلمة حق

..
محدش هيحس بضرورة محاكمة الراجل دا

الا اللى بيعانى لغاية دلوقتى من فقد البصر

لان عينه ضاعت فى المظاهرات السلمية

..
محدش هيحس بضرورة محاكمة الراجل دا

الا اللى قاعد على كرسى متحرك وفقد رجليه

لانه وقف فى وش الظلم وقال لأ

..
محدش هيحس بضرورة محاكمة الراجل دا

الا اللى خد على دماغه بالشوم واتهانت كرامته

واتسحل فى المعتقلات

..

محدش هيحس بضرورة محاكمة الراجل دا

الا اللى لسة لغاية دلوقتى بيتحاكم محاكمات عسكرية

لان قال رأية بصراحة وافتكر اننا بقينا فى دولة ديموقراطية

..

محدش هيحس بضرورة محاكمة الراجل دا

الا اللى بقاله 18 سنة متغرب عشان يجيب لقمة عيش نضيفة

لاولاده

..

محدش هيحس بضرورة محاكمة الراجل دا

الا اللى اهله ماتوا فى العبارات اللى غرقت وهمه راجعين من الحج

..

محدش هيحس بضرورة محاكمة الراجل دا

الا اللى شاف الظلم بعنيه وحس يعنى ايه

مش قادر يجيب حقه وهو قدام عينيه

..

محدش هيحس بضرورة محاكمة الراجل دا

الا اللى اشتغل سواق تاكسى وهو متخرج من كلية هندسة

..

محدش هيحس بضرورة محاكمة الراجل دا

الا اللى قضوا نص عمرهم فى المعتقلات

بتهم باطلة ملفقة لانهم وقفوا فى وجه هذا

النظام الفاسد

--------------

المحاكمة دى مش بس رمز لعدل القضاء المصرى

لأ دى كمان عبرة لكل واحد بيفكر يخون بلاده

بجد انا مستغربة ازاى الناس صعبان عليهم واحد زى دا

واحد قاتل لشعبه ..زاهق لارواح الابرياء

ميصعبش عليكو غالى يا حبايبى

ابدا .. عمرى ما هتنزل دمعة من عينى على هذا الرجل

ابدااااااا

قل جاء الحق وزهق الباطل ان الباطل كان زهوقا

رمضان..^_^

السلام عليكم ورحمة الله وبركاته

كل سنة وانتم طيبين

رمضان كريم

..

الصراحة احساسى السنادى مختلف برمضان

فعلا انه رمضان الحرية

برغم ماتمر به مصر الان من احداث

ولكن هذه هى توابع الثورة ودى حاجة

بتتكرر بعد معظم الثورات

..

ولتانى مرة بقضى رمضان بره مصر

واكتشفت انه مش وحش اوى زى منا كنت متخيلة

بالعكس

النهار هنا طويل والجو حلو

والبرامج الدينية السنادى تتصارع

ماشاءالله

مليووووووون برنامج وبرنامج

ودا فضل كبير علينا من ربنا

سبحان الله

رمضان اللى فات كانت المسلسلات هى

اللى بتتصارع

سبحان مغير الاحوال

حاسة بصحوة وبدايات نهضة

وعندى امل كبيييييييييير اوى

وبسطانة..^_^

وشئ جميل لما تقف فى صلاة التراويح

وجنبك حد مغربى

وحد اردنى

وحدود مصرية

وحد سودانى

وحد اجنبى

تحس فعلا يعنى ايه فيه فى العالم

مليار وتولتوميت مليون مسلم

من جنسيات وثقافات مختلفة

..

الحمدلله على نعمة الاسلام وكفى بها نعمة

بالموناسبة النهاردة اول يوم فى حملة التدوين اليومى

لشهر اغسطس

وربنا يقدرنا ونكملها على خير يارب

..

اسيبكم مع بعض مواعيد البرامج

برنامج مع التابعين

د.عمرو خالد

الساعة 2 الظهر على قناة MBC

..

برنامج احبك ربى

الداعية.مصطفى حسنى

الساعة 11 بالليل على اقرأ

..

برنامج ثورة على النفس

الداعية. معز مسعود

الساعة 6 او 6وربع على القناة الثانية المصرية

..

برنامج يوم فى الجنة

الشيخ. محمود المصرى

الساعة 6.45 على اقرأ

................................................................