الثلاثاء، 29 نوفمبر 2011

فضفضة السنين..


البوست طويل وكله رغى وفضفضة .. يعنى حاجة مش مهمة :)

..
نسيت اقولك انى النهاردة كسرت نضارتى

دوست عليها واتدشدشت .. شفت بقى .. كنت دايما


بشتكى انها مشبرة وانى مش بشوف بيها كويس


دلوقتى بقى انا مش هشوف خالص ..


--------


آه صحيح مش انا اكتشفت ان الموبيل بتاعى فيه راديو !!


رغم انه بقاله معايا 4 سنين ولسة مكتشفة كده ..


خايفة اكون لسة مكتشفتش ناس عايشة معايا اكتر من الموبيل..


بتأخر انا فى الاكتشافات دايما ودايما بحس بـ"الدهشة"


---------


كنت فاكرة ان فيه ناس عشان منجحتش فى شئ معين ان حياتها


بايظة ووحشة ..


بس اول مرة اكتشف عكس كده ..


الناس دى رغم انها منجحتش فى الشئ المعين دا بس طلع عندها كنوز


كتيرة مكنتش متصوراها ولا كنت احلم بيها


عشان كده عندهم رضا غريب اوى ...

تفتكر هو دا الرضا


اللى حاولت تزرعه فيا من سنين ؟


----------


تعبت اوى من السياسة ..آه والله .. بس قررت ابعد عنها


شوية عشان خاطرك بس الفترة دى لغاية ما اخلص السنادى


واحققلك الى كان نفسك فيه باذن الله


----------


وبالموناسبة بقى بما اننا بنتكلم فى السياسة اهوت


عايزة اقولك ان الناس اللى اتعرفت عليهم فى المظاهرات


عثولين اوى وجدعان اوى اوى .. تحسهم طبيعيين كده


مش راسمين وشوش غير وشوشهم ..:)


-----------


انا بكره الاسنان الصفرا اوى ... بحس انها بتأذينى زى السجاير


بالظبط


----------


نسيت اسألك .. هيه مش غريبة ان حد يبقى معاك بقاله 6 سنين


بحالهم ولسة بيراقبك عشان يحاول يكتشفك !!!


انا مش معقدة اوى كده ولا غامضة حتى عشان تبذل كل الجهد دا..


انا بس مبحبش حد يعرف عنى حاجة انا مش عايزاه يعرفها..بس


-----------


انا عارفة ان حياتى مفيهاش حاجة مهمة اوى عشان احكيها لحد


بس اللى اعرفه ان الحد المهم فى حياتك بتحكيله كل حاجة عنك


.. وانت مهم اوى عندى :)

هناك 14 تعليقًا:

دعاء العطار يقول...

رغم انها فضفضه الا انها برضه مفيده وفيها معانى كتير بين السطور

وبما انى بحبك .. فاى كلام تقوليه يبقى مهم ليا :)

~ISLAM~ يقول...

احكى وفضفضى وخليكى سيمبل وشفافه

فضفضتك جميلة وزعلان جدا ع النضاره

انا كمان نضارتى مكسوره

هى فرة وادايره فى البلد ولا ايه :)

sara draz يقول...

ديدى العطار
^_^ دايما كومنتاتك تخلينى اتكثف كدهوت
<3
وانا كمان بحبك اوى وربنا اعلم بالقلوب
..

sara draz يقول...

اسلام
:)
الحمدلله ان موضوع النضارة ده مش عندى بس
لازم نكون دم واحد بردو كلنا مصريين وكده يعنى
..
ميرسى على مرورك يا فندم :)

P A S H A يقول...

آخر فقرة رهيـبة جداً بجد :)
في منتهى البساطة والعمق
أحييكي عليها جداً

امل الاسلام يقول...

اخيرا لقينا حاجة متشابهين فيها يابنتى :D
..
انا برضك مش بحب حد يعرف عنى حاجة خاااااااااااااااااااااااالص
_مش لازم كل حاجة فى حياتنا تتعرف_
_كل واحد عنده سر جوا منه ومداريه..الحقيقة ومداريها حتى عن اقرب حد ليه_
:D
هم دول القاعدتين اللى ماشية عليها فى حياتى

راء يقول...

تؤ منتيش غامضة :)
انتي حلوة
وفضفضي طول ما ده بيريحك
ولعلمك اصدق كلام بنقوله هو التخاريف ديه

Ghada , Rofayda يقول...

فضفضه لذيذه وعسوله
وبريئة وشقيه
وفي نفس الوقت فيها معاني عجبتني

mid0 elmasri يقول...

هههههههه والله صعبتى عليا
ياعينى النضاره اتكسرت ومش هتشوفى
عموما انا هحاول اسجل لينك المدونه بتاعتك معايا وابقى اكمل قرايه بعدين

sara draz يقول...

ميدو المصرى
:)
الحمدلله اخيرا صلحتها
أسعدنى مرور حضرتك

sara draz يقول...

روفيدة
^_^ احم .. طالعالك يا فندم

sara draz يقول...

رودى
ايون فعلا اصدق كلام بنقوله هو التخاريف
^_^ ..

sara draz يقول...

مريم
:))
ماشى
وبالمناسبة .. سيبها بظروفها

sara draz يقول...

باشا
شوكران ^_^