مؤذية ..

تعالج الآلام بطريقة  - مؤذية -

فكلما قابلها جرحٌ - داسته - ليزيد ألمها 

ويزداد صراخها لتصل إلى أقصى الشعور .... فـ - اللاشعور -

لجلك هجرنى منامى ..

" لجلك هجرنى منامى 

وجفيت فيكى كل صاحب .. "

صوتك وانتى بتغنيهالى مش بيغيب عنى

وطول مانا ماشى لوحدى عمال أدندنها

كل اللى كان بيننا فى يوم انتهى يوم ما قلتلك " انا بكرهك.. "

انتى عارفة انى ابدا مكنتش اقصدها بس انتى وصلتينى لإنى اقولك كده

عارفة .. بتوحشينى

كل شئ فيكى بيوحشنى وخصوصا عينيكى ..

قلبك , رسايلك , كتبك , رسوماتك , اغانيكى , حتى هداياكى

...

لساكى مش حاسة بالوجع ؟

وايه يفيد الوجع بعد الفراق ؟!

الفراق , عارفة يعنى ايه الفراق ؟

يعنى لما أتعب واكون محتجاكى جنبى أتعب اكتر لانك مش هنا 

ولا هتكونى تانى هنا

يعنى لما افرح واجرى عليكى احضنك ألاقى ..سراب

يعنى لما أنطق اسمك أقول بعدها .. كانت حبيبتى

:((

...

خايف أقابلك فى يوم صدفة وتتقابل عيوننا 

ساعتها هتشوفى الضعف فى عنيا بعد ما حاولت أخبيه سنين ..

خايف من ضعفى أرجع اقولك سامحينى .. واموت كرامتى

خايف أسمع اغانيكى وافتكرك

خايف أقابلك بعد عشرين سنة وتسألينى انت مين ؟

....

ليه يا دنيا كل ما تدينى حب يكون حب بـ وجع !!

.. اول سطرين جزء من كتاب خارطة الحب لأهداف سويف

يحبهم ويحبونه ..

لما ربنا يبقى آخر اولوياتك تبقى حياتك فاضية

ملهاش معنى ولا قيمة

 ومهما حاولت تحط حاجات فى حياتك تملاها بيها عمرك ما هتحس

انها حياة فعلا

ربنا هو اللى خلقنا وكل أمر أمرنا بيه له حكمة لا يعلمها الا هو

فلما نخالف كلام ربنا يبقى منلومش الا نفسنا يوم الحساب

ربنا مش محتاجنا .. احنا اللى محتاجينه 

...

" يَا أَيُّهَا الَّذِينَ آمَنُوا مَنْ يَرْتَدَّ مِنْكُمْ عَنْ دِينِهِ

 فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ 

أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِينَ

 يُجَاهِدُونَ فِي سَبِيلِ اللَّهِ وَلا يَخَافُونَ لَوْمَةَ لائِمٍ 

ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ وَاسِعٌ عَلِيمٌ "

.......

بوست شخصى ,,

بفضى اللى جوايا وبس عشان مموتش من الكبت ..

خذلتنى تانى وتالت ورابع

وانا تعبت .. اه تعبت من التبرير والتوضيح والكلام اللى مبيملاش الفجوة اللى بيننا

الفجوة تاريخها من اول يوم استنيتك فيه وملقيتكش

كنت مشغول .... ومقتنع انك طالما مشغول انى مش من حقى احس بالفجوة دى 

رغم احتياجى ليك !!

انت غريب اوى ...

عرفت اكتر شئ بيضايقنى ايه وعملته 

لأ ومش مرة .. انت عملته مليون مرة

وعايزنى اسامحك .؟!

هو انا جبل ؟ ولا انا ايه بالظبط !

...

رغم انى بحبك قد الدنيا زى ما قلتلك قبل كده

إلا إنى بكره اكون حد ثانوى فى حياتك

خلاص مش قادرة

سامحنى 

لازم أمشى....

...

تعبانة جدا لانى قررت امشى 

وعارفة انى هكون لوحدى ومش معايا حد يشاركنى

احلامى ولا طموحاتى ولا اى حاجة من هبلى 

بس الفكرة انك فى الفترة الاخيرة تخليت عن مشاركتك ليا فيهم

فالأمر دلوقتى اختلف

وزى ما بيقولوا وجع ساعة ولا ألف ساعة 

...

محتجالك رغم كل كلمة قاسية قلتهالك عن الرحيل

:(((

أُصلّى..

فى كل يوم أذهب الى صومعتى لأصلّى ...

أصلّى بقلب لا يخشع قد أثقلته الهموم وبثت فيه 

 سوادها ..

جوارحى الصامتة وقلبى المُثقل بالذنوب تفسد علىّ 

صلاتى وتلهينى عنك .. مولاى

يا خبير بذات الصدور .. يا عالم السر والجهر ..

 أستغفرك , فهل تغفر ذنوبى يا الله ؟!

...

أحاول فى كل ركعةٍ أن أتقرب إليك , وأترك 

الدنياوراء ظهرى

أستمع لكلماتك , لعل كلمة واحدة تحيينى , 

ويقشعر لها بدنى ويدمع لها فؤادى قبل عيناى ..

" بل تؤثرون الحياة الدنيا , والآخرة خير وأبقى 

"

" وَلاَ مُتَّخِذَاتِ أَخْدَانٍ "

قال الله تعالى " وَلاَ مُتَّخِذَاتِ أَخْدَانٍ " 

تفسير ابن كثير

قال ابن عباس وكذا روي عن أبى هريرة ومجاهد والشعبي : ( و متخذات أخدان يعني 

أخلاء )

وقال الحسن البصري : ( يعني الصديق )

......

تفسير الجلالين 

( ولا متخذات أخذان ) تعنى أخلاء يزنون بهن سرا

 ......

تفسير القرطبي

 

{ولا متخذات أخدان}  تعنى أصدقاء على الفاحشة، وأحدهم خدن وخدين، وهو الذي 

يخادنك

 وقيل : ذات الخدن التي تزني بواحد

......

 يقول المولى عز وجل {ولا متخذات أخدان} النساء 25 ، ومعنى قوله عز وجل 

 {متخذات أخدان} أى متخذات أخلاء ومن هذا فلا يجوز للفتاة أن تتخذ رفيق لها أو

 صاحب لها وعدم الإجازة نص كريم صريح وفي هذا حكمة من الله عز وجل فإن 

المرأة عاطفية بطبيعتها .

 وأراد الله عز وجل أن يبعدنا عن هوى النفس باتقاء الشبهات والتحصن من الفتنة بسد 

جميع نوافذها 

...... 

مفيش حاجة اسمها دا صاحبى او زى اخويا

فى حاجة اسمها حدود ربنا شرعها لينا 

فمينفعش اتخطى حدود ربنا واقول انا عارفة حدودى كويس

فى حاجة اسمها دين وحاجة اسمها حلال وحرام

اه فى تعامل طبعا ولكن فى نطاق العمل وعلى قد خد وهات

انما مينفعش اهزر مع اى حد ولا اروح واحكيله مشاكلى

وافضفض معاه

مينفعش يا جماعة لان دا فى حد ذاته فيه شهوة

قال  

النبي صلى الله عليه وسلم :

(حُفت النار بالشهوات وحفت الجنة بالمكاره)

الشهوات :هي ما تميل إليه النفس من غير تعقل ولا تبصر ولا مراعاة لدين ولا مراعاة 

لمروءة .

وقد أحيطت الجنة بما تكرهه النفوس , لأن الباطل محبوب للنفس الأمارة بالسوء والحق

 مكروه لها , فإذا تجاوز الإنسان هذا المكروه وأكره نفسه الأمارة بالسوء على فعل 

الواجبات وعلى ترك المحرمات فحينئذ يصل إلى الجنة

...

" وَلاَ مُتَّخِذَاتِ أَخْدَانٍ"

  صدق الله العظيم 

عن الأمنيات التى تحطمت !!

 

 لسة قادرة تبتسم !!

..

عيد ميلادك بكرة , كان نفسى نكون سوا ..

..

أكتر حاجة واجعانى انى اكون معاكى فى نفس المكان

ومش قادرة اوصلك...

..

ويوم ما تجيلى من آخر الدنيا , تلاقينى فقدت الأمل فى رجوعك ومشيت قبلك بثوانى..

..

كل مرة أعلق نفسى بأمنيات وأحلام عارفة انها مش هتتحقق

وكل مرة أقع على ضهرى وأنكسر :(

..

مكلتش ولا لقمة من الصبح , مش قادرة اعمل حاجة غير التفكير فيكى

وشعورى بالذنب انى خذلتك , احساس وحش اوى

..

نفسى أفضفض بس مش قادرة

وأنا وياك ..

كل ما اشوف صورك أبتسم 

افتكر يوم ما كنا سوا هنا قاعدين عالارض بنلعب شطرنج

وتقولى هغلبك وأقعد أقاوح معاك وأقولك مش هتقدر

لغاية ما تغلبنى فى الاخر

ومعرفش اغلبك ابدا..

الدنيا غلبتنا احنا الاتنين وضعنا من بعض

وراحت كل حاجة ...

...

 

فاكر يوم ما جيت من برا وكنت زعلانة اوى 

وجيت من غير اى كلام رميت شنطتى ونمت على رجلك

أكيد فهمتنى يومها ... حطيت ايدك على راسى وقعدت تلعب فى شعرى

من غير ولا كلمة .. 

..

عكازك وحشنى اوى ، شياكتك ، اهتمامك بشراباتك وساعتك العتيقة 

وقلمك الفضى ، كل تفصيلة فيك وحشتنى

وشعرك ، :) ماتضحكش ، عارفة انك مكنش عندك شعر بس بردو كنت بحبك كده

..

للاسف مش قادرة أتأقلم ان حد تانى ييجى مكانك وياخده بأى صفة كان هو..

محدش عارف يبقى زيك .. ومش هيعرف

..

مش محتاجة منك غير حضن دافى 

الحضن اللى كنت بتديهونى لما ارجع من السفر وابقى ميتة من الفرح

لانى عارفة انى هقابلك بعد غياب

..

عارف ، كنت بحب السفر وانت موجود لانى كنت عارفة انى لما ارجع

هلاقيك فى المطار مستنينى بعربيك الصغيرة الحمرا

واول ما تشوفنى فى المطار تشاورلى وتستنانى اول ما اطلع بأجمل حضن

فى الدنيا ... حضن اللى يخليك حاسس ان حد محتويك بجد

بس اخر مرة جيت فيها من السفر كنت انت سافرت

وملقتش حد يحضننى ساعتها ..

فمن للأمة الغرقى ..

فمن للأمة الغرقى إذا كنا الغريقينا 

و من للغاية الكبرى إذا ضمرت أمانينا 

و من للحق يجلوه إذا كلت أيادينا

 أسائلكم و نفسي ...هل أصاب القحط وادينا؟

 و هل جفت ينابيع الهدى؟ أم أجدبت فينا ؟ 

فما المعنى بأن نحيا فلا نحيي بنا الدين ؟ 

و ما المعنى بان نجتر مجدا ماضيا حينا ؟

 وحينا نطلق الآهات ترويحا و تسكينا..

 أينفعنا انهمار الغيث إن ماتت أراضينا ؟

 و ما الجدوى من الأفكار ؟ ما جدوى المربينا؟ 

الإمام . حسن البنا 

يوم ما مات ..

التليفون بيرن .. " آلو .. "

" أيوه يا سارة افتحوا الأخبار بسرعة شوفوا اللى بيحصل فى بورسعيد .. "

_ ناس نازلة من المدرجات على الملعب ، فوضى فظيعة ، أخبار عن ناس بتموت _

" هو فى ايه ؟؟ "

" بورسعيد مولعة ، الجمهور بيقتل فى بعضه "

" انتى بتقولى ايه ؟؟ "

_ القنوات كلها بتتكلم عن أسماء شهدا وجرحى والناس بتتصل تصوت فى البرامج _

دخلت الفيس يمكن أقدر افهم حاجة ..

- الساعة 12 او يمكن 2 بالليل  وانا بشوف الاخبار-

" مين دا .. محمود!!! "

_ بيج شرقية توداى على الفيس منزلة صورة محمود وكاتبة فوقيها الشهيد محمود 

سليمان _

جاتلى حالة من الصدمة ، مش قدرت أصدق ، لغاية دلوقتى مش مستوعبة الموضوع

" آلاء ، هو دا محمود اللى معانا فى صناع ؟ "

" هو ..."

.............................. :(((((

بعد نص ساعة على الفيس

" د . إسلام فريد وكذا حد كتب :  فى أخبار ان محمود عايش وإنه مُصاب .. ادعوله يا 

جماعة "

حاولنا نصدق ، كنا بنتعلق بأى قشاية ،اى اشاعة ، يمكن تطلع صح

.. الفيس كله بقى اسود .. الكل عامل حداد

------ محمود مـــــــــــــــــــــــــات -----

 _محمود سليمان ، صانع حياة ، طالب بهندسة الزقازيق، ظهرت نتيجته بعد 

استشهاده بشهر او يمكن

شهرين ، أحب أفرحكم ،، محمود نجـــــــــــح :) _

--------

يومها محدش نام ، محدش كان مستوعب ان واحد كان جنبنا وشايل عمود من 

عواميد فكرتنا استشهد

أيوه استشهد ، محمود كان من الناس اللى شاركت فى الثورة وكان من الأولتراس 

وكانت باينة

اوى ان أمن الدولة كان بيصفى الناس اللى شاركت فى الثورة ومن أهمهم الأولتراس

-------

تانى يوم اتقابلنا ، كل واحد فينا نازل من بيته ساند نفسه بالعافية

الوشوش صفرا ، والايدين بتترعش ، والعيون بتلمع من كتر الدموع اللى محبوسة 

جواها

- شباب وبنات صناع الحياة ، ثورجية الزقازيق وكل اخوات محمود -

أول ما اتقابلنا حسينا بالقهـــر ، قعدنا نعيط ، ونصبر بعض

كل بنت فينا كانت حاسة ان اخوها مات

وكل ولد كان بيحاول يمسك دموعه قدامنا بس مقدرش ..

عمرى ما شفت مظاهرة زى دى ..

بعد ماجابوا صور محمود .. مشينا لفينا البلد دى حتة حتة

كنت شايفة الحزن فى عينين كل واحد فينا .. محدش قدر يمسك دموعه فى اليوم دا

.. اتقهرنا .. اتقهرنا بالأوى

ماشيين ، رافعين صورك ، كنت حاسة بفخر انى رافعة صورتك ، كنت

حاسة انك معانا ، ماشى جنبنا ..

عدينا من تحت بيتك وبدأنا الهتاف ..

" محمود .. فى الجنة ،، محمود فى الجنة "

" الدية للولية .. أم محمود قوية "

" وحياة دمك يا محمود .. ثورة تانى حتى الموت "

" يا عسكر لِمْ فلوسك .. أم محمود هتدوسك "

هتاف طالع من قلوبنا وسط الدموع .. وكل الجيران واقفين يهتفوا ويعيطوا معانا ..

كان يوم حزن ، يوم ما اتقتلت غدر يا محمود .. الله يرحمك 

الشوارع والحيطان وكل شبر كان بيبكى  ، ولفترة كان الاسود لبسنا 

وكان الحزن والبُكا هما لغتنا ..

تانى يوم بعد المذبحة ، كان فيه واقفة صامتة لكل صانعي الحياة على مستوى 

الجمهورية

عشان اللى ماتوا فى بورسعيد وخصوصا عشانك يا محمود :)

عارف ،، حسيت فى اليوم دا انى فى عزاء ملكى ، كنا واقفين تحت الجمعية  ، 

شايلين  صورك

، ساكتين ، بندعيلك .

تالت يوم ، صورك كانت فى كل مكان فى الزقازيق ، عالحيطان وفى القلوب ،وفى كل 

شبر ،

حتى فى الميدان ،، يا بختك ياعم :)

كتبوا عالشارع بتاعك " شارع الشهيد محمود سليمان " وعلقوا عليه يافطة 

مكتوبالك

كتبوا عليها " مات المناضل المثال ،ياميت خسارة عالرجال "

وبعد اسبوع ، دخلت الجمعية ، قلبى اترعش ، صورك فى كل حتة فيها ،

شعارات ، صور ، هتافات المظاهرات ، ورسايل ليك ..

محدش مكنش بيدعيلك :) ، يابختك يا محمود سبقتنا للجنة ..

..

عارف يا محمود انا بكتب عنك ليه دلوقت ! 

لإنى منستكش ، اصل انت مش حد مات وعيطنا عليه شوية وخلاص

لا يا محمود ، انت فكرة ، والافكار لاتموت ..

مش هنسيب حقك يا محمود وعمرنا ما هننساك ..

الى لقاءٍ أتمنى ان يكون قريبا ..