مجزرة دير ياسين .. لم و لن ننسى

انا عارفة ان مش وقته اتكلم عن فلسطين وان الاولى دلوقتى الكلام عن 

 الفيلم المسئ للرسول -عليه افضل الصلاة والسلام -

 لكن لما قريت الكلام دا - اللى هتقروه تحت دلوقتى - مقدرتش منشورهوش عشان تفتكروا دم اخواتنا واهلنا فى فلسطين .. 

مجزرة دير ياسين .. لم و لن ننسى

فى أثناء حرب 1948 ارتكب اليهود الصهاينة 34 مجزرة لتنفيذ مخططهم فى فلسطين - ألا وهو ارهاب الفلسطينيين واجبارهم 

على الرحيل من أرضهم -

 

وكانت أبرز المجازر وأشهرها مجزرة  " دير ياسين " وقد نفذت هذه المجزرة عصابتا الأرغون - التى يتزعمها مناحيم بيجن -

 وشتيرن بالتنسيق مع الهاجاناه فى ليلة وصباح 10 من ابريل

1948

حيث تقع قرية دير ياسين على الطريق المؤدية  الى القدس وقد قام الصهاينة بذبح وقتل 254 رجلا وامرأة وطفلا وفى بعض 

التقديرات 360   بأسلوب وحشى ...

ونستطرد قليلا فى ذكر قصص من مذبحة دير ياسين كأحد نماذج الارهاب الصهيونى .

ففى ذلك اليوم بقى عند " حياة البلبيسى " فى المدرسة 15 طفلا وطفلة  فقامت بتحويل المدرسة الى مركز اسعاف لأنها مسئولة 

الصليب الأحمر فى دير ياسين . وظنت أنها تحمى نفسها والأطفال بذلك , وأخذ الجرحى بالتوافد عندها , وعند الظهيرة جاء اليهود 

الصهاينة وأجهزوا على الجرحى , وقتلوا جميع الأطفال وقتلوها , ثم وضعوا الجميع على شكل كومة جتت فوقها جُثتها , 

وأسرعت 

فتاة يهودية وخلعت علم الصليب الأحمر عن باب المدرسة وغرسته عميقا فى كومة الجثث والجميع يصفق لها اعجابا بما تفعل !!

أما الحاج " اسماعيل عطية " وهو عجوز فى الــ 95 من عمره فبعد أن قتلوه جروه من رجليه وسط الشارع وأخذوا يرقصون 

حوله ويصيحون , وكانت زوجته تحمل حفيدها الوحيد عند البيت فجاءت فتاة يهودية تحمل بيدها بلطة فضربت الطفل على رأسه 

فتطاير نخاعه ,والتصق بالجدار , ثم قتلت الجدة وأخذت ترقص فوق الجسدين القتيلين !!

وأخذوا " صالحية " وهى شابة  فقتلوا طفلها ذو السنتين أمام عينيها , ثم وضعوها فى حلقة وأخذوا يرقصون حولها ويمزقون

ثيابها 

قطعة قطعة , وفى النهاية عاجلتها إحدى الفتيات اليهوديات بعدة طعنات فى وجهها وصدرها  وبطنها وكانت حاملا فى الشهر

  السابع .. 

الغريب فى الأمر أن مناحيم بيجن - القائم بمذبحة دير ياسين -  حاز على جائزة نوبل للسلام !!!!!!!

وتوالت المذابح الصهيونية بعد ذلك بين حين واخر ففى عام 1953حدثت مذبحة " قبية " وهى قرية عربية فى الضفة الغربية 

هاجمها نحو 600 جندى صهيونى بقيادة الإرهابى أريل شارون , وقد أدى الهجوم الليلى  الى خسائر فادحة فى الأرواح  وتعمد 

الصهاينة  تدمير البيوت  على السكان  , حتى إن امرأة شوهدت تجلس بجانب كومة من أنقاض منزلها الذى برز من بين ركامه أيدٍ 

وأرجل ٍ صغيرة , هى أشلاء أولادها الستة , بينما كانت جثة زوجها الممزقة بالرصاص ملقاة فى الطريق المواجه للبيت !!

..............................................

من فصل المجازر التى تعرض لها الشعب الفلسطينى من كتاب فلسطين دراسات منهجية فى القضية الفلسطينية لــ د. محسن محمد صالح

أن تكون اخوانجيا ..

 بدأ الامر بحضورى لدروس دينية فى المسجد فى رمضان

انا ووالدتى 

واستمرينا عالدروس دى فترة كبيرة 

لغاية بعد كده ما بقيت بحضر دروس دينية بس فى بيت واحدة من صحباتى

كانت مجموعتنا 6 او 7 بنات

كل اسبوع بناخد درس فى بيت واحدة مننا 

وبس .. من هنا بدأت الحكاية وبدأت علاقتى بالاخوان

:)

......

اوقات بتستغربوا الناس الاخوانجية وسر تعلقهم بجماعتهم

وبتغلطوا فيهم كتير وبتقولوا عليهم قطيع ... 

ببساطة انتو مش فاهمين ليه الناس دى مترابطة اوى

هتكلم معاكم عن تجربتى الشخصية مع الاخوان وهتكلم عن حاجات

فى الاخوان محدش بيتكلم عنها لما بتيجى سيرتهم

............

مش معنى ان انا اخوانجية يبقى من حقك تشتمنى وتهيننى ومطلوب منى أسكت !!

ولو اتكلمت يقولوا شوفوا الاخوان بيقولوا ايه ؟!

بالذمة دا عدل ؟!

ومش معنى ان انا اخوانجية يعنى انا من ضمن القطيع اللى انتو مسمينهم قطيع 

رغم انهم من أكفأ الناس واكثرها مكانة واحتراما

ومش معنى ان انا اخوانجية يبقى لما اعمل اى حاجة تشكك فى نوايايا وتقول دى

مش قصدها كذا لا دى قصدها كذا وكذا وكذا

الغريبة انه إذ فجأة بقيتوا بتشتموا فى الاخوان مع انهم كانوا من اكتر الناس 

تأثيرا فى الشارع البسيط من قبل الثورة 

فى ناس كتير متأثرين بمسلسل الجماعة - اللى بيسئ للاخوان - وماشيين يتكلموا

عن الاخوان على اساس الفكرة الغلط اللى خدوها عنهم

ودا مش عدل ..لانك من المفروض انك لما تبحث فى موضوع تاخد فيه كل الاراء

وتبدأ تعقلها وتشوف مين الصح

 .......

عيلتى مفيهاش حد اخوان .. عيلتى ماشاء الله منوعة فيها كل حاجة ماعدا الاخوان...

منكرش ان جتلى اوقات كنت بتمنى فيها ان اكون من عائلة اخوانجية عشان الصراع

اللى بيننا ينتهى 

بس فى نفس الوقت وجودى فى عائلة زى دى علمنى الصبر - ايوالله - الصبر اللى 

يخليك تسمع من دا ودا ودا حتى لو كان كلامه بيحمل اساءة ليك

بس لازم تسمع وتستوعب الكل وفى الاخر كده كده مبادئك مبتتغيرش

.....

اول لما تيجى سيرة الاخوان بييجى فى بالكم المرشد ومرسى والبلتاجى وإلخ إلخ إلخ

بس انا اول ما بتيجى سيرة الاخوان .. بفتكر الناس اللى علمتى ازاى اقرب من ربنا

وازاى البس حجابى - مش شرط انى البس الخمار طبعا - وازاى اتعامل مع البشر بأخلاق

ديننا , وازاى اشتغل عند ربنا بالعمل التطوعى , الناس اللى وقفت جنبى وشجعتنى انى 

اكون انسانة ناجحة , الناس اللى كل ما افتكرهم افتكر قول الله تعالى

{‏وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ 

وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَنْ ذِكْرِنَا

 وَاتَّبَعَ هَوَاهُ وَكَانَ أَمْرُهُ فُرُطًا‏}‏

,الناس اللى كانوا ليا صُحبة صالحة دايما بدعى ربنا يرزقهالى ...

اول ما بتيجى سيرة الاخوان بفتكر أبو صحبتى اللى كل عيد كانوا بيعتقلوه عشان

ميقضيش العيد مع اسرته .. وابو صحبتى التانية  اللى كان مجهز شنطته تحت السرير

عشان عارف انهم هيعتقلوه قريب .. وابو صحبتى التالتة اللى منعوه من الترقية من

مكان شغله لمجرد انه اخوان .. وصحبتى اللى بتجيلنا الدرس معيطة عشان اعتقلوا اخوها

والمستر بتاعى اللى فى نص الحصة بييجوا يخدوه ويودوه المعتقل

وكمية المواقف المستفزة اللى بتحكيهالى صحبتى لما جولهم بتوع أمن الدولة الفجر وقلبوا البيت

رأسا على عقب وخدوا كل الفلوس واللاب توبات اللى فى البيت ورموا الكتب وهتكوا حرمات البيت

وخدوا  اى حاجة ليها تمن معاهم عشان يستفيدوا منها

..........

تفتكر لما تعيش دا كله سنين من عمرك وييجى حد بسهولة يشتم فى الاخوان هتصدقه

دانتا لو قلتلى انهم بيعملوا ايه مش هصدقك

لانى عشت جوا الناس دى وعاشرتهم واتعلمت منهم كتير وشفت فيهم نماذج كتير

مذهلة بمعنى الكلمة 

أرجوك متختزلش الاخوان فى كلمة وحشة او شتيمة وانت متعرفهمش

مؤذية ..

تعالج الآلام بطريقة  - مؤذية -

فكلما قابلها جرحٌ - داسته - ليزيد ألمها 

ويزداد صراخها لتصل إلى أقصى الشعور .... فـ - اللاشعور -

لجلك هجرنى منامى ..

" لجلك هجرنى منامى 

وجفيت فيكى كل صاحب .. "

صوتك وانتى بتغنيهالى مش بيغيب عنى

وطول مانا ماشى لوحدى عمال أدندنها

كل اللى كان بيننا فى يوم انتهى يوم ما قلتلك " انا بكرهك.. "

انتى عارفة انى ابدا مكنتش اقصدها بس انتى وصلتينى لإنى اقولك كده

عارفة .. بتوحشينى

كل شئ فيكى بيوحشنى وخصوصا عينيكى ..

قلبك , رسايلك , كتبك , رسوماتك , اغانيكى , حتى هداياكى

...

لساكى مش حاسة بالوجع ؟

وايه يفيد الوجع بعد الفراق ؟!

الفراق , عارفة يعنى ايه الفراق ؟

يعنى لما أتعب واكون محتجاكى جنبى أتعب اكتر لانك مش هنا 

ولا هتكونى تانى هنا

يعنى لما افرح واجرى عليكى احضنك ألاقى ..سراب

يعنى لما أنطق اسمك أقول بعدها .. كانت حبيبتى

:((

...

خايف أقابلك فى يوم صدفة وتتقابل عيوننا 

ساعتها هتشوفى الضعف فى عنيا بعد ما حاولت أخبيه سنين ..

خايف من ضعفى أرجع اقولك سامحينى .. واموت كرامتى

خايف أسمع اغانيكى وافتكرك

خايف أقابلك بعد عشرين سنة وتسألينى انت مين ؟

....

ليه يا دنيا كل ما تدينى حب يكون حب بـ وجع !!

.. اول سطرين جزء من كتاب خارطة الحب لأهداف سويف

يحبهم ويحبونه ..

لما ربنا يبقى آخر اولوياتك تبقى حياتك فاضية

ملهاش معنى ولا قيمة

 ومهما حاولت تحط حاجات فى حياتك تملاها بيها عمرك ما هتحس

انها حياة فعلا

ربنا هو اللى خلقنا وكل أمر أمرنا بيه له حكمة لا يعلمها الا هو

فلما نخالف كلام ربنا يبقى منلومش الا نفسنا يوم الحساب

ربنا مش محتاجنا .. احنا اللى محتاجينه 

...

" يَا أَيُّهَا الَّذِينَ آمَنُوا مَنْ يَرْتَدَّ مِنْكُمْ عَنْ دِينِهِ

 فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ 

أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِينَ

 يُجَاهِدُونَ فِي سَبِيلِ اللَّهِ وَلا يَخَافُونَ لَوْمَةَ لائِمٍ 

ذَلِكَ فَضْلُ اللَّهِ يُؤْتِيهِ مَنْ يَشَاءُ وَاللَّهُ وَاسِعٌ عَلِيمٌ "

.......

بوست شخصى ,,

بفضى اللى جوايا وبس عشان مموتش من الكبت ..

خذلتنى تانى وتالت ورابع

وانا تعبت .. اه تعبت من التبرير والتوضيح والكلام اللى مبيملاش الفجوة اللى بيننا

الفجوة تاريخها من اول يوم استنيتك فيه وملقيتكش

كنت مشغول .... ومقتنع انك طالما مشغول انى مش من حقى احس بالفجوة دى 

رغم احتياجى ليك !!

انت غريب اوى ...

عرفت اكتر شئ بيضايقنى ايه وعملته 

لأ ومش مرة .. انت عملته مليون مرة

وعايزنى اسامحك .؟!

هو انا جبل ؟ ولا انا ايه بالظبط !

...

رغم انى بحبك قد الدنيا زى ما قلتلك قبل كده

إلا إنى بكره اكون حد ثانوى فى حياتك

خلاص مش قادرة

سامحنى 

لازم أمشى....

...

تعبانة جدا لانى قررت امشى 

وعارفة انى هكون لوحدى ومش معايا حد يشاركنى

احلامى ولا طموحاتى ولا اى حاجة من هبلى 

بس الفكرة انك فى الفترة الاخيرة تخليت عن مشاركتك ليا فيهم

فالأمر دلوقتى اختلف

وزى ما بيقولوا وجع ساعة ولا ألف ساعة 

...

محتجالك رغم كل كلمة قاسية قلتهالك عن الرحيل

:(((

أُصلّى..

فى كل يوم أذهب الى صومعتى لأصلّى ...

أصلّى بقلب لا يخشع قد أثقلته الهموم وبثت فيه 

 سوادها ..

جوارحى الصامتة وقلبى المُثقل بالذنوب تفسد علىّ 

صلاتى وتلهينى عنك .. مولاى

يا خبير بذات الصدور .. يا عالم السر والجهر ..

 أستغفرك , فهل تغفر ذنوبى يا الله ؟!

...

أحاول فى كل ركعةٍ أن أتقرب إليك , وأترك 

الدنياوراء ظهرى

أستمع لكلماتك , لعل كلمة واحدة تحيينى , 

ويقشعر لها بدنى ويدمع لها فؤادى قبل عيناى ..

" بل تؤثرون الحياة الدنيا , والآخرة خير وأبقى 

"

" وَلاَ مُتَّخِذَاتِ أَخْدَانٍ "

قال الله تعالى " وَلاَ مُتَّخِذَاتِ أَخْدَانٍ " 

تفسير ابن كثير

قال ابن عباس وكذا روي عن أبى هريرة ومجاهد والشعبي : ( و متخذات أخدان يعني 

أخلاء )

وقال الحسن البصري : ( يعني الصديق )

......

تفسير الجلالين 

( ولا متخذات أخذان ) تعنى أخلاء يزنون بهن سرا

 ......

تفسير القرطبي

 

{ولا متخذات أخدان}  تعنى أصدقاء على الفاحشة، وأحدهم خدن وخدين، وهو الذي 

يخادنك

 وقيل : ذات الخدن التي تزني بواحد

......

 يقول المولى عز وجل {ولا متخذات أخدان} النساء 25 ، ومعنى قوله عز وجل 

 {متخذات أخدان} أى متخذات أخلاء ومن هذا فلا يجوز للفتاة أن تتخذ رفيق لها أو

 صاحب لها وعدم الإجازة نص كريم صريح وفي هذا حكمة من الله عز وجل فإن 

المرأة عاطفية بطبيعتها .

 وأراد الله عز وجل أن يبعدنا عن هوى النفس باتقاء الشبهات والتحصن من الفتنة بسد 

جميع نوافذها 

...... 

مفيش حاجة اسمها دا صاحبى او زى اخويا

فى حاجة اسمها حدود ربنا شرعها لينا 

فمينفعش اتخطى حدود ربنا واقول انا عارفة حدودى كويس

فى حاجة اسمها دين وحاجة اسمها حلال وحرام

اه فى تعامل طبعا ولكن فى نطاق العمل وعلى قد خد وهات

انما مينفعش اهزر مع اى حد ولا اروح واحكيله مشاكلى

وافضفض معاه

مينفعش يا جماعة لان دا فى حد ذاته فيه شهوة

قال  

النبي صلى الله عليه وسلم :

(حُفت النار بالشهوات وحفت الجنة بالمكاره)

الشهوات :هي ما تميل إليه النفس من غير تعقل ولا تبصر ولا مراعاة لدين ولا مراعاة 

لمروءة .

وقد أحيطت الجنة بما تكرهه النفوس , لأن الباطل محبوب للنفس الأمارة بالسوء والحق

 مكروه لها , فإذا تجاوز الإنسان هذا المكروه وأكره نفسه الأمارة بالسوء على فعل 

الواجبات وعلى ترك المحرمات فحينئذ يصل إلى الجنة

...

" وَلاَ مُتَّخِذَاتِ أَخْدَانٍ"

  صدق الله العظيم 

عن الأمنيات التى تحطمت !!

 

 لسة قادرة تبتسم !!

..

عيد ميلادك بكرة , كان نفسى نكون سوا ..

..

أكتر حاجة واجعانى انى اكون معاكى فى نفس المكان

ومش قادرة اوصلك...

..

ويوم ما تجيلى من آخر الدنيا , تلاقينى فقدت الأمل فى رجوعك ومشيت قبلك بثوانى..

..

كل مرة أعلق نفسى بأمنيات وأحلام عارفة انها مش هتتحقق

وكل مرة أقع على ضهرى وأنكسر :(

..

مكلتش ولا لقمة من الصبح , مش قادرة اعمل حاجة غير التفكير فيكى

وشعورى بالذنب انى خذلتك , احساس وحش اوى

..

نفسى أفضفض بس مش قادرة

وأنا وياك ..

كل ما اشوف صورك أبتسم 

افتكر يوم ما كنا سوا هنا قاعدين عالارض بنلعب شطرنج

وتقولى هغلبك وأقعد أقاوح معاك وأقولك مش هتقدر

لغاية ما تغلبنى فى الاخر

ومعرفش اغلبك ابدا..

الدنيا غلبتنا احنا الاتنين وضعنا من بعض

وراحت كل حاجة ...

...

 

فاكر يوم ما جيت من برا وكنت زعلانة اوى 

وجيت من غير اى كلام رميت شنطتى ونمت على رجلك

أكيد فهمتنى يومها ... حطيت ايدك على راسى وقعدت تلعب فى شعرى

من غير ولا كلمة .. 

..

عكازك وحشنى اوى ، شياكتك ، اهتمامك بشراباتك وساعتك العتيقة 

وقلمك الفضى ، كل تفصيلة فيك وحشتنى

وشعرك ، :) ماتضحكش ، عارفة انك مكنش عندك شعر بس بردو كنت بحبك كده

..

للاسف مش قادرة أتأقلم ان حد تانى ييجى مكانك وياخده بأى صفة كان هو..

محدش عارف يبقى زيك .. ومش هيعرف

..

مش محتاجة منك غير حضن دافى 

الحضن اللى كنت بتديهونى لما ارجع من السفر وابقى ميتة من الفرح

لانى عارفة انى هقابلك بعد غياب

..

عارف ، كنت بحب السفر وانت موجود لانى كنت عارفة انى لما ارجع

هلاقيك فى المطار مستنينى بعربيك الصغيرة الحمرا

واول ما تشوفنى فى المطار تشاورلى وتستنانى اول ما اطلع بأجمل حضن

فى الدنيا ... حضن اللى يخليك حاسس ان حد محتويك بجد

بس اخر مرة جيت فيها من السفر كنت انت سافرت

وملقتش حد يحضننى ساعتها ..